15 апрели соли 2024 дар шаҳри Гулистони вилояти Суғд ҷаласаи гуруҳҳои кории Ҷумҳурии Тоҷикистон ва Ҷумҳурии Қирғизистон баргузор гардид.

Дар ҷаласаи корӣ фармондеҳони қӯшунҳои сарҳадии ду кишвар Раҷабалӣ Раҳмоналӣ ва Уларбек Шаршиев, Раиси вилояти Суғд Раҷаббой Аҳмадзода ва намояндаи ваколатдори Президенти Қирғизистон дар вилояти Ботканд Абдикарим Алимбаев, роҳбарони сохторҳои ҳифзи ҳуқуқи ду тараф ва раисони шаҳру ноҳияҳои наздисарҳадӣ иштирок доштанд.

Дар мулоқот тазаккур дода шуд, ки дар натиҷаи фаъолияти назарраси гуруҳҳои кории ду ҷониб ва талошҳои муштараки мақомоти салоҳиятдор дар соли 2023 ва се моҳи соли 2024 муносибатҳои дӯстона ба роҳ монда шуда, ҷонибҳо масоили мавҷударо бо роҳи ҳамдигарфаҳмӣ ва риояи анъанаҳои неки ҳамсоядорӣ баррасӣ ва ҳал намуда истодаанд.

29 марти соли 2024 дар шаҳри Бодканди вилояти Бодканди Ҷумҳурии Қирғизистон мулоқоти навбатии ҳамраисони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистон ва Қирғизистон — Саймумин Ятимов ва Қамчибек Ташиев баргузор гардид. 

Роҳбарони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон муҳокимаи масъалаи делимитатсияи сарҳади давлатии Тоҷикистон ва Қирғизистонро дар қитъаҳои боқимонда идома дода, баҳри минбаъд муайян намудани хати сарҳад байни ду давлат ба натиҷаҳои назаррас ноил гардиданд.

Инчунин ба гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон ҷиҳати идомаи раванди делимитатсия ва демаркатсияи сарҳади давлатии Тоҷикистон ва Қирғизистон супоришҳои мушаххас дода шуд.

Имрӯз Раиси вилояти Суғд Раҷаббой Аҳмадзода директори тиҷоратии ширкати «Новапорт»-и Федератсияи Россия Сергей Дмитриевро ба ҳузур пазируфт.

Дар мулоқот масоили ҳамкории тарафайн ва густариши он мавриди муҳокима қарор гирифт.

Раиси вилоят зимни суҳбат аз талошу кӯшишҳои сарони ду давлат Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия Владимир Путин дар самти густариши хамкории мутақобила ва зиёд намудани мубодилаи молу маҳсулот байни ду кишвар ёдовар гашт.

Таъкид гардид, ки рушди ҳамкорӣ дар бахши хизматрасонӣ мусофирон тавассути ширкатҳои ҳавоӣ боиси зиёд гаштани рафту омади шахрвандон ва ҷалби ҳарчи бештари сайёҳон ба вилояти Суғд мегардад.

Раиси вилояти Суғд Раҷаббой Аҳмадзода директори генералии корхонаи муштараки "Зарафшон" Чан Яо Минро ба ҳузур пазируфт. 

Аснои суҳбат таъкид гардид, ки корхонаи муштарак ба истихроҷ ва коркарди маъдани куҳӣ ва истеҳсоли маҳсулоти соҳа машғул буда, дар он беш аз 2800 нафар кор мекунанд ва маоши баланд мегиранд.

Дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо саҳми корхона корхонаҳои нав ба фаъолият шурўъ карда, дар саноатикунонии босуръати мамлакат нақши бориз мегузоранд. Яке аз чунин корхонаҳо ба истеҳсоли мис машғул аст ва маҳсулот содиротӣ мебошад. Коргоҳи мазкур иқтидори коркарди 165 ҳазор тонна консентрати дорои мис ва тиллоро дар як сол дошта, маҳсулоти ниҳоии аълосифатро аз он истеҳсол менамояд. Маврид ба зикр аст, ки аз ин миқдор консентрати коркардшуда миси катодӣ, ҳамчунин ба миқдори муайян тилло ва нуқра истеҳсол карда мешавад. То ба сохта ба истифода додани корхонаи мазкур хокаи консентрати дорои мис ҳамчун ашёи хом ба дигар давлатҳо барои коркарду истеҳсоли маҳсулоти ниҳоӣ содирот карда мешуд.

Имрӯз Раиси вилояти Суғд Раҷаббой Аҳмадзода соҳибкори маъруф, роҳбари кулли ширкати бисёрсоҳавии илмӣ-техникии «Нур» Нурулло Усмоновро ба ҳузур пазируфт.

Зимни суҳбати самимӣ аз фаъолияти бисёрсамтаи соҳибкор ва саҳми ӯ дар рушди соҳаҳои гуногуни хоҷагии халқ ёдоварӣ карда шуд. 

Тазаккур дода шуд, ки соҳибкор Нурулло Усмонов дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро сармашқи кори худ қарор дода, дар бахшҳои мухталиф фаъолияти назаррас дорад.

16 марти соли 2024 дар толори меҳмонхонаи «Суғдиён» мулоқоти Раиси вилояти Суғд, Раиси Федератсияи футболи вилояти Суғд Раҷаббой Аҳмадзода ва ноиби Президенти Федератсияи футболи Тоҷикистон Дилшод Ҷўразода бо аъзои Федератсияи футболи вилоят ва соҳибкорон баргузор гардид.

Дар мулоқот масъалаи рафти иҷрои дастуру супоришҳои Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон муҳтарам Рустами Эмомалӣ, ки дар ҷаласаи кории Федератсияи футболи Тоҷикистон санаи 3 ноябри соли 2023 баён гардида буд, мавриди таҳлил қарор гирифт.

Раиси вилоят таъкид кард, ки футбол дар кишвар яке аз намудҳои маъмули варзиш ба ҳисоб рафта, зери таваҷҷўҳ ва дастгириҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва саҳми беназири Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон муҳтарам Рустами Эмомалӣ қарор дошта, сол аз сол рушд ва инкишоф ёфта истодааст.