Мулоқоти Раиси вилоят бо роҳбарони корхонаҳои азими саноатӣ

Раиси вилояти Суғд Раҷаббой Аҳмадзода роҳбарони як қатор корхонаҳои калони вилоятро ба ҳузур пазируфта, барои зиёд намудани ҳаҷми истеҳсоли маҳсулот ва таъмини рушди соҳаи саноат супоришҳои мушаххас дод.

Раиси вилоят аз ҷумла бо директори тиҷоратии ҶДММ “Анзоб” Толиб Холзода, директори генералии Ширкати куҳӣ-саноатии Тоҷикистону Хитой Як Чжи Сай, директори генералии ҶДММ “ТВЕА Душанбе саноати куҳӣ”, Ли Сю Мин, муовини директори генералии ҶДММ “Талко Голд” Шариф Ҷумъазода мулоқотҳо анҷом дод.

Раиси вилоят барои иҷрои уҳдадориҳо ва таъмини рушди соҳаи саноат, зиёд намудани ҳаҷми истеҳсоли маҳсулот, истифодаи пурраи иқтидорҳои истеҳсолӣ, ташкили ҷойҳои нави корӣ, боз ҳам беҳтар намудани шароити коргарон, саҳмгузорӣ дар бунёди иншооти муҳими иҷтимоӣ вазифагузорӣ намуд.

Мулоқоти Раиси вилоят Раҷаббой Аҳмадзода бо намояндагони вилояти Мински Ҷумҳурии Беларус

Раиси вилояти Суғд Раҷаббой Аҳмадзода бо муовини раиси Кумиҷроияи вилояти Мински Ҷумҳурии Беларус Денис Курленко ва гуруҳи соҳибкорони ин кишвар, ки ба вилоят ташриф оварданд, мулоқот намуд.

Дар мулоқот ҳамзамон Сафири Фавқуллода ва Мухтори Ҷумҳурии Беларус дар Ҷумҳурии Тоҷикистон Виктор Денисенко, роҳбарони идораҳои давлатии ду вилоят низ иштирок намуданд.

Дар мулоқот таъкид карда шуд, ки бо сиёсати оқилонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Беларус муҳтарам Александр Лукашенко ду давлати дӯст дар бахшҳои мухталиф ҳамкории густарда доранд.

Дар доираи созишномаҳои дуҷониба миёни вилоятҳои Суғд ва Минск равобити хуби иқтисодӣ дошта, доираҳои тиҷоратии ду тараф мунтазам барои зиёд намудани гардиши молу маҳсулот кӯшиш менамоянд.

Мулоқоти Раиси вилоят бо намояндаи доимии Ташкилоти Оғохон оид ба рушд дар Тоҷикистон

Раиси вилояти Суғд Раҷаббой Аҳмадзода бо намояндаи доимии Ташкилоти Оғохон оид ба рушд дар Тоҷикистон Қозидавлат Қоимдодов мулоқот намуд.

Дар мулоқот масъалаи ҳамкории тарафайн мавриди баррасӣ қарор гирифт.

Раиси вилоят меҳмононро ба вилояти Суғд хайрамақдам гуфта, таъкид дошт, ки бо дастгириҳои доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилоят рушди иқтисодиву иҷтимоӣ таъмин гардида, сатҳи зиндагии мардум беҳтар гардида истодааст.

Дар вилоят ба пешрафти соҳаи саноат, ба кор андохтани хатҳои нави истеҳсолӣ, то ба коркарди ниҳоӣ расонидани ашёи хоми ватанӣ ва истеҳсоли маҳсулоти босифату ивазкунандаи воридот таваҷҷуҳи хоса зоҳир гардида, ҳамасола садҳо адад корхонаҳои саноатӣ фаъол гардонида мешавад. Дар натиҷаи тадбирандешиҳо соли гузашта ҳаҷми истеҳсоли маҳсулоти саноатӣ ба 26 миллиарду 51,9 миллион сомонӣ расонида шуд, ки нисбат ба соли қаблӣ бо нархҳои муқоисавӣ 2 миллиарду 923,9 миллион сомонӣ зиёд буда, суръати афзоиш бо назардошти индекси нархҳо 110,7 фоизро ташкил медиҳад.

Мулоқот бо намояндаи ширкати «Стейт инвестмент групп компани»-и Ҷумҳурии мардумии Чин

Раиси вилояти Суғд Раҷаббой Аҳмадзода бо намояндаи ширкати «Стейт инвестмент групп компани» Иля-Ванг Тинг Дан мулқот кард.

Дар мулоқот ҷонибҳо масъалаи ба роҳ мондани ҳамкорӣ ва воридсозии таҷҳизоти муосир, истеҳсоли "энергияи сабз" бо истифода аз панелҳои офтобӣ барои корхонаҳои саноатиро баррасӣ қарданд.

Раиси вилоят иброз дошт, ки дар Ҷумҳурии Тоҷикистон ба рушди соҳаи саноат таваҷҷуҳи хоса зоҳир гардида, аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон саноатикунонии мамлакат ҳадафи стратегӣ эълон шудааст. Бо назардошти ин, ҷиҳати бунёди корхонаҳои нави саноатӣ тадбирҳои зарурӣ амалӣ гардида, ҳамасола садҳо корхонаҳои нав сохта мешавад. Айни замон дар вилоят беш аз 1100 корхонаи саноатӣ фаъолият дошта, талаботи корхонаҳо ба нерӯи барқ низ сол аз сол зиёд гардида истодааст.

Воридсозии таҷҳизоти замонавӣ ва муосир имкон медиҳад, ки "энергияи сабз" истеҳсол карда шуда, истифодаи сарфакоронаи нерӯи барқ таъмин гардад. 

Мулоқоти Раҷаббой Аҳмадзода бо намояндаи ЮНИСЕФ дар Тоҷикистон Артур ван Дизен

25 январ Раиси вилояти Суғд Раҷаббой Аҳмадзода бо намояндаи ЮНИСЕФ дар Тоҷикистон Артур ван Дизен мулоқот намуд.

Дар мулоқот ба саҳми Хазинаи кӯдакони СММ (UNICEF) дар Тоҷикистон дар самти татбиқи лоиҳаҳои гуногун дар бахшҳои маорифу тандурустӣ баҳои арзанда дода шуда, таъкид гардид, ки ташкилоти байналмилалӣ минбаъд низ ҳамкории худро идома медиҳад.

Раиси вилоят Раҷаббой Аҳмадзода аснои суҳбат илова намуд, ки дар Ҷумҳурии Тоҷикистон бо дастгириҳои доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои кӯдакону наврасон шароити зарурии таълиму тарбия, истироҳату фароғат фароҳам оварда шуда, ба ин қишри ҷомеа, ки ояндаи давлату миллат ҳаст, таваҷҷуҳи зарурӣ зоҳир карда мешавад. Ҳамзамон, давлат кӯдакону наврасоне, ки бепарастор мондаанд, зери ҳимоят гирифта, мунтазам ба онҳо ғамхорӣ менамояд.

Дар ин раванд ҳамкорӣ бо ЮНИСЕФ низ натиҷабахш буда, саҳми ин ташкилот дар амалӣ намудани барномаҳои гуногун, аз ҷумла таъмини солимии кӯдакон, ғизои модару кӯдак, пешгирӣ ва табобати бемориҳои сироятӣ назаррас мебошад.

Мулоқоти Раиси вилоят Раҷаббой Аҳмадзода бо Мариан Шиманович

Раиси вилояти Суғд Раҷаббой Аҳмадзода менеҷери лоиҳаи Идоракунии захираҳои обӣ дар Тоҷикистон Мариан Шимановичро ба ҳузур пазируфт.

Дар мулоқоти ҷонибҳои масъалаи таҳкими ҳамкорӣ миёни мақомоти иҷроияи ҳокимияти давлатии вилоят ва ташкилоти «Хелветас» — и Шветсария баррасӣ шуд.

Зимни суҳбат қайд гардид, ки саҳми ташкилоти байналхалқӣ дар татбиқи лоиҳаҳои обёрӣ ва захираҳои обӣ назаррас буда, бо дастгирии он як қатор лоиҳаҳо амалӣ шудааст.

Раиси вилоят таъкид кард, ки дар вилояти Суғд беш аз 60 ҳазор адад хоҷагиҳои деҳқонӣ фаъолият дошта, бо назардошти талабот ҳамасола ҳаҷми истеҳсоли маҳсулоти кишоварзӣ зиёд гардида истодааст. Бинобар ин, зарурати таҷдиди пойгоҳҳои обкашӣ ба миён омада, татбиқи лоиҳаҳо дар ин самт муҳим мебошад. Дар шаҳру ноҳияҳои Исфара, Конибодом, Бобоҷон Ғафуров, Ашту Мастчоҳ, Зафаробод заминҳо тавассути пойгоҳҳои обкашӣ обёрӣ мешавад ва мақомоти иҷроияи ҳокимияти давлатии вилоят омода аст барои амалисозии лоиҳаҳои нав ва таҷдиди пойгоҳҳо ҳамкорӣ намояд.

Мулоқот бо роҳбарияти ширкати илмӣ - истеҳсолии «Спирит»-и Федератсияи Россия

Раиси вилояти Суғд Раҷаббой Аҳмадзода роҳбарияти ширкати илмӣ истеҳсолии «Спирит»-и Федератсияи Россия Олег Люпак ва ҳайати ҳамроҳонашро ба ҳузур пазируфт.

Дар мулоқот масоили ҳамкории тарафайн ва густариши он мавриди муҳокима қарор гирифт.

Раиси вилоят ҳайати меҳмононро ба вилояти Суғд хайрамақдам гуфта, аз талошу кӯшишҳои сарони ду давлат Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия муҳтарам Владимир Путин дар самти густариши ҳамкории мутақобила ва зиёд намудани мубодилаи молу маҳсулот байни ду кишвар ёдовар гашт.