Раиси вилояти Суғд Раҷаб Аҳмадзода муовини Раиси вилояти Хатлон Амирхон Қурбонзодаро ба ҳузур пазируфт. 

Ҷонибҳо зимни суҳбат доир ба масоили таъмини рушди соҳаҳо, дастгирии бахши хусусӣ, ҷалби соҳибкорони минтақаҳои мухталиф ва татбиқи лоиҳаҳои муштарак ибрози назар намуданд.

Раиси вилоят зикр кард, ки бо сиёсати оқилонаи Пешвои миллат муҳтарам Эмомалӣ Раҳмон дар мамлакат рушди устувори ҳамаи бахшҳо таъмин гардида, афзоиши ҳаҷми истеҳсоли маҳсулоти саноатӣ ба беҳбудии сатҳи зиндагии мардум таъсири мусбат мерасонад.

13 июн Раиси вилояти Суғд, Раиси Федератсияи футболи вилоят Раҷаб Аҳмадзода бо ноиби Президенти Федератсияи футболи Тоҷикистон Алишер Урунов, инчунин Сайвалӣ Дониёрзода мулоқот намуд.

Дар мулоқот асосан мавзуъҳои асосии рушди футбол дар вилоят мавриди тавваҷуҳ қарор гирифт. 

Таъкид гардид, ки барои муҷаҳҳаз намудани варзишгоҳҳо ва мутобиқати онҳо ба стандартҳои байналмилалӣ корбарӣ идома дошта, барои бозии дастаҳои футбол шароити мусоид фароҳам оварда хоҳад шуд.

Имрӯз Раиси вилояти Суғд Раҷаб Аҳмадзода Сафири Фавқулода ва Мухтори Ҷумҳурии Исломии Покистон дар Ҷумҳурии Тоҷикистон Муҳаммад Саид Сарварро ба ҳузур пазируфт.

Сафири Ҷумҳурии Исломии Покистон бо мақсади иштирок дар Намоишгоҳи байналмилалии савдо «Суғд–2025» ба вилояти Суғд ташриф овардааст.

Дар ҷараёни мулоқот ҷонибҳо оид ба таҳкими робитаҳои иқтисодиву тиҷоратӣ, афзоиши табодули молу маҳсулот, густариши ҳамкориҳои сармоягузорӣ ва ҷалби сармоя ба иқтисодиёти вилояти Суғд мубодилаи афкор намуданд.

Раиси вилоят иброз дошт, ки вилояти Суғд бо дарназардошти имкониятҳои васеи саноативу истеҳсолӣ, мавқеи ҷуғрофии мусоид ва захираҳои меҳнатии фаровон омода аст, ки бо доираҳои соҳибкориву сармоягузории Покистон ҳамкориҳои мутақобилан судмандро роҳандозӣ намояд.

Раиси вилояти Суғд Раҷаб Аҳмадзода Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Валихан Турехановро ба ҳузур пазируфт.

Сафири Қазоқистон бо мақсади иштирок дар Намоишгоҳи байналмилалии савдо «Суғд–2025» ба вилояти Суғд ташриф овард.

Зимни мулоқот ҷонибҳо доир ба таҳкими муносибатҳои иқтисодӣ ва густариши равобити дӯстона миёни Тоҷикистону Қазоқистон мубодилаи афкор намуда, ҷиҳати тавсеаи ҳамкориҳои мутақобилан судманд, махсусан дар сатҳи байниминтақавӣ, изҳори омодагӣ карданд.

Раиси вилоят иброз дошт, ки таҳти раҳнамоии сарони ҳар ду кишвар — Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қазоқистон муҳтарам Қосим-Жомарт Тоқаев робитаҳои Тоҷикистону Қазоқистон рӯ ба рушд буда, ҷонибҳо ҳамчун ҳамсоягони нек ва шарикони стратегӣ дар самтҳои гуногун ҳамкории зич доранд.

Раиси вилояти Суғд Раҷаб Аҳмадзода Сафири Фавқулода ва Мухтори Ҷумҳурии Исломии Эрон дар Ҷумҳурии Тоҷикистон Алиризо Ҳақиқиёнро ба ҳузур пазируфт.

Сафири Эрон бо мақсади иштирок дар Намоишгоҳи байналмилалии савдо «Суғд–2025» ба вилояти Суғд ташриф овардааст.

Зимни мулоқот ҷонибҳо вазъи кунунии муносибатҳои дуҷонибаро байни Ҷумҳурии Тоҷикистон ва Ҷумҳурии Исломии Эрон, бахусус ҳамкориҳоро бо вилоятҳои мухталифи Эрон мавриди муҳокима қарор дода, атрофи масоили мавриди таваҷҷуҳи муштарак табодули афкор намуданд.

Раиси вилоят иброз дошт, ки таҳти роҳбарии хирадмандонаи Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Исломии Эрон муҳтарам Масъуд Пизишкиён муносибатҳои дӯстона, ҳамкорӣ ва эътимоди мутақобила миёни ду кишвар дар марҳалаи нави рушд қарор доранд.

Раиси вилояти Суғд Раҷаб Аҳмадзода Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдурраҳмон Ар-Решайдонро ба ҳузур пазируфт.

Сафир ва ҳайати расмии ҳамроҳи ӯ бо мақсади иштирок дар Намоишгоҳи байналмилалии савдо «Суғд–2025» ба вилояти Суғд ташриф оварданд.

Зимни мулоқот ҷонибҳо масъалаҳои марбут ба рушди ҳамкориҳои дуҷониба байни Ҷумҳурии Тоҷикистон ва Шоҳигарии Арабистони Саудӣ, таҳкими муносибатҳои дӯстона ва густариши робитаҳои тиҷоративу иқтисодӣ, сармоягузорӣ ва фарҳангиро мавриди баррасӣ қарор доданд.