Боғу токпарварӣ яке аз самтҳои афзалиятноки соҳаи кишоварзӣ ба шумор рафта, солҳои охир бо ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилояти Суғд масоҳати боғу токзор зиёд мегардад. 

Бо иқдоми нек ва ҳамкории судманди Тоҷикистону Ӯзбекистон аз Испания ниҳолҳои дарахтони мевадиҳанда ворид карда шуда, дар майдони 50 гектар шинонида мешаванд, ки 40 гектараш ба Боғи миллии «Ваҳдат» рост меояд. Дар ҷараёни бунёди боғҳои нав мутахассисони варзида ба боғдорон маслиҳатҳои зарурӣ медиҳанд.

Раиси вилояти Суғд Раҷаббой Аҳмадзода зимни иштирок дар маъракаи ниҳолшинонӣ иброз дошт, ки ин иқдом ба таҳкими дӯстӣ ва ҳамкории олимон ва кишоварзон мусоидат намуда, рушди соҳаи боғдориро ба сатҳи баланд мебардорад. Ниҳолҳои шинонидашуда тавассути усули муосири қатрагӣ обёрӣ мешавад. Ба гуфтаи мутахассисон, ин дарахтон дар солҳои дуюм ва сеюм самар дода, ҳосили фаровон хоҳанд дод.

18 март Раиси вилояти Суғд Раҷаббой Аҳмадзода бо мақсади шиносоӣ бо шароити кории Театри давлатии драмавӣ-мусиқии ба номи Тӯҳфа Фозилова аз ин боргоҳи ҳунар боздид ба амал овард.

Зимни боздид роҳбарият ва аҳли эҷоди театр доир ба фаъолияти худ ва барномаҳои ҳунарӣ ба Раиси вилоят маълумот пешниҳод намуданд. Раҷаббой Аҳмадзода нақши театри мазкурро дар рушди фарҳангу ҳунар ва баланд бардоштани завқи эстетикии ҷомеа муҳим арзёбӣ намуда, ба ҳунармандон ва масъулон барои тақвияти фаъолияти эҷодӣ ва пешниҳоди намоишномаҳои баландмазмун тавсияҳо дод.

Ҳамзамон, масъалаи беҳбуд бахшидани инфрасохтори театр, навсозии таҷҳизоти техникӣ ва муҳайё сохтани шароити мусоид барои аҳли эҷод мавриди баррасӣ қарор гирифт. 

Кишоварзони шаҳри Конибодом бо истифода аз обу ҳавои мусоид ва ҷиҳати татбиқи таҷрибаҳои илмии пешрафта дар истеҳсолот бори нахуст кишти пахтаро дар зери плёнка роҳандозӣ намуданд. 

Маросими оғози кишти пахта дар зери плёнка дар ҳоҷагии деҳқонии "Аҳмадҷон" баргузор шуда, Раиси вилояти Суғд Раҷаббой Аҳмадзода бо пошидани нахустин донаҳои умед ба кишти пахта оғоз бахшид. 

Соли ҷорӣ кишоварзони шаҳри Конибодом дар майдони 5690 гектар пахта кишт мекунанд. Танҳо дар ҳоҷагии деҳқонии "Аҳмадҷон" дар 17 гектар кишти пахта ба роҳ монда мешавад. 

Дар ҳудуди Маҷмааи варзишии "20 - солагии Истиқлолият"-и шаҳри Хуҷанд бо иштироки Раиси вилояти Суғд Раҷаббой Аҳмадзода беш аз 250 бех ниҳоли ҳамешасабзи сарви аризонӣ шинонида шуд.

Дар ҳашари ниҳолшинонӣ кормандони ташкилоту идораҳо ва масъулони Мақомоти иҷроияи ҳокимияти давлатии шаҳри Хуҷанд ширкат варзида, саҳми худро дар кабудизоркунии муҳит гузоштанд.

Раиси вилоят зимни суҳбат бо масъулин зарурати тақвияти корҳои ободониву созандагиро таъкид намуда, дастур дод, ки макони мазкур, ки ҳамчун ҷойи истироҳат, тафреҳ ва машқу тамрин хизмат мекунад, бо дарахтони ҳамешасабзу ороишӣ ҳарчӣ бештар сабзу хуррам гардонида шавад.