Дар ноҳияи Деваштич бинои ҲХДТ сохта мешавад

Ба истиқболи 35-солагии Истиқлоли давлатии Ҷумҳурии Тоҷикистон дар ноҳияи Деваштич бинои маъмурии ҲХДТ бунёд карда мешавад.

3 июн Раиси вилояти Суғд Раҷаббой Аҳмадзода бо гузоштани нома ба наслҳо ба сохтмони бинои маъмурӣ санги асос гузошт. Иншооти мазкур тариқи ҳашар аз тарафи аъзои ҳизб ва кулли мардуми шарафманди ноҳия бунёд гардида, аз ду ошёна ва таҳхона иборат мебошад.

Мувофиқи лоиҳа дар бино 8 ҳуҷраи корӣ, маҷлисгоҳ, китобхона ва дигар утоқҳои ёрирасон ҷой дода шудааст. Масъулин азм доранд иншооти мазкурро бо сифати баланд ва риояи ҳатмии талаботу меъёри бинокорӣ соли равон сохта ба истифода диҳанд. ҲХДТ дар ноҳия фаъолияти муназзам дошта, саҳми кормандон ва аъзои он дар пешрафт ва анҷом додани корҳои ободониву созандагӣ басо назаррас мебошад. Дар ноҳияи Деваштич зиёда аз 9000 аъзои ҲХДТ ҳастанд ва 98 ташкилоти ибтидоӣ фаъолият дорад.

Боздиди Раиси вилоят аз шаҳри Гулистон

Бо мақсади фароҳамсозии шароити мусоид барои истироҳату фароғати сокинон дар соҳили Баҳри тоҷик тадбирҳои зарурӣ амалӣ карда мешавад. 

Раиси вилояти Суғд Раҷаббой Аҳмадзода зимни боздид аз шаҳри Гулистон ба роҳбарияти шаҳр барои ташкили инфрасохтори лозимӣ дар соҳили Баҳри тоҷик супоришҳо дод.

Таъкид гардид, ки дар фасли тобистон шумораи зиёди сокинон ва шаҳрвандони хориҷӣ барои истироҳату табобат ба вилояти Суғд ташриф меоранд ва шаҳри Гулистону соҳили Баҳри тоҷик аз минтақаҳои серодам ба ҳисоб меравад. Бо назардошти ин, зарур аст, ки барои оббозӣ ва фароғат бояд ҳамеша шароити мусоид фароҳам карда шавад.

Тақдими туҳфаҳои идона ба кӯдакону наврасон дар шаҳри Гулистон

Раиси вилояти Суғд Раҷаббой Аҳмадзода ба муносибати Рўзи байналмилалии ҳифзи кўдакон дар шаҳри Гулистон кӯдакони беморро аёдат кард.

Аснои аёдат таъкид гардид, ки дар Тоҷикистони маҳбубамон аз ҷониби Пешвои миллат муҳтарам Эмомалӣ Раҳмон ба маъюбону беморон таваҷҷуҳи хоса зоҳир гардида, ниёзмандон зери сарпарастии давлат қарор доранд.

Сипас, бо дастгирии мақомоти иҷроияи ҳокимияти давлатии шаҳр ва саҳмгузории соҳибкорон барои фарзандони оилаҳои ниёзманд дастурхони идона ороста шуда, аз номи Пешвои миллат муҳтарам Эмомалӣ Раҳмон туҳфаҳо супорида шуд.

Таҷлили Рӯзи байналмилалии ҳифзи кӯдакон дар Суғд

1 июн дар Боғи фарҳангию фароғатии 'Наврӯзгоҳ" бахшида ба Рӯзи байналмилалии ҳифзи кӯдакон чорабинии идона баргузор гардид. 

Омӯзгорону мураббиён ва хонандагону тарбиятгирандагони муассисаҳои томактабӣ бо оростани хаймаҳои гуногун иди хурдсолонро ба шаҳомати хоса ҷашн гирифтанд.

Раиси вилояти Суғд Раҷаббой Аҳмадзода зимни боздид аз идгоҳ ба кӯдакону наврасон ва ғолибони як қатор озмунҳо туҳфаҳо супорид.

Тавре таъкид гардид, дар тамоми ҷаҳон ҳар сол санаи 1 июн Рўзи байналмилалии ҳифзи кўдакон таҷлил карда мешавад ва ба шарофати сиёсати дурбинона ва хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишварамон ҷиҳати ҳифзу ҳимояи ҳуқуқҳои оила ва кўдак тадбирҳои зарурӣ роҳандозӣ мегарданд.

Мулоқоти Раиси вилоят бо соҳибкорони Федератсияи Россия

Раиси вилояти Суғд Раҷаббой Аҳмадзода роҳбарияти ширкати «Формулаи нур»-и Федератсияи Россия Сергей Исоков, роҳбари шӯрои директорони Фонди байналмиллаии сармоягузории Orient Investment JSC Ли Куанг Дао ва ҳайати ҳамроҳонашро ба ҳузур пазируфт.

Дар мулоқот масоили ҳамкории тарафайн ва густариши он мавриди муҳокима қарор гирифт. Роҳбари вилоят ҳайати меҳмононро ба вилояти Суғд хайрамақдам гуфта, аз талошу кӯшишҳои сарони ду давлат Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия Владимир Путин дар самти густариши хамкории мутақобила ва зиёд намудани мубодилаи молу маҳсулот байни ду кишвар ёдовар гашт.