20 феврали соли 2025 дар Кохи фарҳанги ба номи Абӯабдуллоҳи Рӯдакӣ ба муносибати Рўзи Қувваҳои Мусаллаҳи Ҷумҳурии Тоҷикистон ҷамъомади тантанавӣ баргузор гардид.

Раиси вилояти Суғд Раҷаббой Аҳмадзода зимни суханронӣ аз номи Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат муҳтарам Эмомалӣ Раҳмон тамоми хизматчиёни ҳарбӣ ва кулли мардуми вилоятро ба муносибати 32-юмин солгарди таъсисёбии Қувваҳои Мусаллаҳи Ҷумҳурии Тоҷикистон табрик намуд.

Қайд карда шуд, ки муҳимтарин ва арзишмандтарин меъёри ватандориву ватандўстӣ, расидан ба қадри Ватан, миллат ва давлати соҳибистиқлол - ин ба ҷо овардани хизмати Ватан ва ҳифзи марзу буми он ба ҳисоб меравад.

Раиси вилояти Суғд Раҷаббой Аҳмадзода дар шаҳри Хуҷанд бо ҷараёни корҳои сохтмонӣ дар бинои иловагии гимназияи №4 шинос гардид.

Бинои сохташавандаи муассисаи таълимӣ аз 4 ошёна бо таҳхона ва 32 синфхонаи таълимӣ иборат буда, барои наздик 2000 хонанда дар ду баст сохта ба истифода дода хоҳад шуд. Сохтмони бинои иловагии таълимӣ тибқи дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби ширкати ватании «Тоҷсохтмон» амалӣ карда мешавад.

Бояд қайд кард, ки «Тоҷсохтмон» аз ширкатҳои сохтмонии маъруф буда, дар бунёди биноҳои истиқоматии баландошёна ва биноҳои маъмуриву хизматӣ таҷрибаи калон дошта, аз ҷониби мутахассисону бинокорони ширкат дар шаҳри Хуҷанд бунёди иншооти гуногунсоҳа аз қабили меҳмонхона, кӯдакистон, марказҳои савдо ва хизматрасонӣ, хонаҳои баландошёнаи истиқоматӣ босуръат ҷараён дорад.

Соли ҷорӣ дар Конибодом дар масоҳати 170 гектар картошкаи барвақтӣ кишт карда мешавад. Дар ин бора зимни боздиди Раиси вилояти Суғд Раҷаббой Аҳмадзода аз хоҷагии деҳқонии «Бизуҳро»-и деҳоти ба номи Абулқосим Лоҳутии шаҳр маълумот дода шуд.

Раиси вилоят дар доираи сафар ба шаҳри Конибодом дар хоҷагии деҳқонии «Бизуҳро» ба кишти картошкаи барвақтӣ оғоз бахшид. Дар суҳбат бо кишоварзон роҳбари вилоят ҷиҳати истифода босамари замин, риояи структураи кишти зироатҳо, истифодаи тухмиҳои хушсифату серҳосили ба маҳал мутобиқ ба масъулон дастуру супоришҳои мушаххас дод. 

Хоҷагии деҳқонии «Бизуҳро» дорои 4 гектар замин буда, аъзои хоҷагӣ асосан картошка, пахта ва шалғам кишт мекунанд. Аҳли заҳмати хоҷагӣ бо назардошти мутобиқ будани замин барои кишти картошкаи барвақтӣ майдони кишти ин намуди маҳсулоти кишоварзиро соли ҷорӣ зиёдтар намуданд.

18 феврал вохӯрии номзад ба вакили Маҷлиси вакилони халқи вилояти Суғд Раҷаббой Аҳмадзода бо интихобкунандагон аз ҳавзаи интихоботии «Фирўзоба», №20 – и шаҳри Конибодом баргузор гардид.

Номзад ба вакили Маҷлиси вакилони халқи вилояти Суғд аз ҳавзаи интихоботии «Фирўзоба», №20 Раҷаббой Аҳмадзода зимни вохӯрӣ бо интихобкунандагон иброз дошт, ки имрўзҳо мардуми шарифи Тоҷикистон дар арафаи маъракаи муҳими сиёсӣ – интихоботи навбатии вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ қарор доранд ва ин чорабинии муҳим рӯзи 2 март доир мегардад.

Дар вохӯрӣ таъкид карда шуд, ки Барномаи пешазинтихоботии номзад ба вакили Маҷлиси вакилони халқи вилояти Суғд Раҷаббой Аҳмадзода дар асоси Барномаи пешазинтихоботии Ҳизби Халқии Демократии Тоҷикистон «Самтҳои муҳимтарини рушди мамлакат дар солҳои 2025-2030» ва шиори «Барои пешрафт ва саодати халқи Тоҷикистон!» таҳия шудааст.