Раиси вилояти Суғд Раҷаб Аҳмадзода бо ҷараёни корҳои навсозӣ ва насбу васли таҷҳизоти муосир дар Неругоҳи барқи обии “Қайроққум” шинос шуд.

Неругоҳи барқи обии “Қайроққум” яке аз иншооти муҳими энергетикии кишвар ба ҳисоб рафта, аз 6 гидроагрегат иборат мебошад. Охирин агрегати неругоҳ ҳанӯз соли 1957 бо тавоноии лоиҳавии 21 МВт ба истифода дода шуда буд. Бо гузашти 68 сол таҷҳизоти асосии неругоҳ фарсуда гардида, иқтидори истеҳсолии он то 12 МВт коҳиш ёфта буд.

Бо дастгириҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз соли 2019 корҳои навсозӣ дар неругоҳ оғоз гардида, дар давоми беш аз панҷ сол гидроагрегатҳои №4, 5 ва 6 пурра навсозӣ гардиданд. Иқтидори ҳар яки онҳо аз 19 ба 29 МВт афзоиш дода шуд.

Дар доираи татбиқи лоиҳаи навсозӣ бо ҷалби шарикони рушд ва мутахассисони ватаниву хориҷӣ як қатор таҷҳизоти муҳими неругоҳ, аз ҷумла таҷҳизоти толори мошинҳо, дастгоҳҳои идоракунии турбинаҳо, трансформаторҳои системаи ангезишӣ, системаҳои назорату идоракунӣ ва дигар таҷҳизоти асосӣ аз кишварҳои пешрафтаи Аврупо дастрас ва иваз карда шуданд.

23 июли соли 2025 дар шаҳри Гулистон машварати корӣ таҳти раёсати Раиси вилояти Суғд Раҷаб Аҳмадзода баргузор гардид.

Дар машварат роҳбари вилоят зикр намуд, ки шаҳри Гулистон яке аз зеботарин ва ободу фараҳбахши кишвар ба ҳисоб рафта, ҳамасола меҳмонони зиёд аз дохил ва хориҷи кишвар бо мақсади истироҳат, фароғат ва тамошои мавзеъҳои табииву туристии он ба ин минтақа ташриф меоранд.

Бо назардошти ин мавқеи муҳими сайёҳӣ ва фароғатии шаҳр, Раиси вилоят масъулони соҳаҳои хоҷагии манзилию коммуналӣ, обу коррезӣ, ҳифзи муҳити зист, маркази назорати давлатии санитариву эпидемиологӣ ва дигар сохторҳои дахлдорро муваззаф намуд, ки дар самти тозаву озода нигоҳ доштани кӯчаву хиёбонҳо, сабзаву хуррам нигоҳ доштани муҳити шаҳр ва таъмини чароғонкунии босифат масъулияти дучандро эҳсос намоянд.

23 июл Раиси вилояти Суғд Раҷаб Аҳмадзода дар шаҳри Гулистон бо раванди корҳои бунёдкорӣ шинос гардид.

Бино ба иттилои масъулон, соли равон дар шаҳри Гулистон 5 корхонаи нави саноатӣ мавриди истифода қарор мегирад, ки дар баробари таъсиси ҷойҳои нави корӣ, ҳаҷми истеҳсоли маҳсулот низ афзоиш меёбад.

Зимни боздид аз ҶДММ “Тиглат” иттилоъ дода шуд, ки корхонаи нав аз ду сехи истеҳсолӣ иборат буда, дар канори он анборҳои нигоҳдории маҳсулоти ниҳоӣ низ бунёд шуда истодаанд. Дар сехҳо рангҳои сохтмонӣ, маҳсулоти воридотивазкунанда ва куттиҳои ранг бо омехтаи об ва масолеҳи сохтмонии хушк истеҳсол мешаванд.

Маҳсулоти ин корхона, аз ҷумла рангҳо бо номи тиҷоратии “Глобус”, “Титан”, “Фрайд” ва “Контакт-Конфар” ба бозори дохилии кишвар ба фурӯш бароварда шуда, барои иваз намудани маҳсулоти воридотӣ хизмат менамояд. Барои назорат ва таҳлили сифати маҳсулот дар ошёнаи дуюми корхона озмоишгоҳ амал мекунад. Ба гуфтаи масъулон, дар ояндаи наздик ба роҳ мондани содироти маҳсулот ба кишварҳои ҳамсоя дар назар аст.

23 июли соли 2025 дар меҳмонхонаи “Суғдиён”-и шаҳри Хуҷанд вохӯрии Раиси вилояти Суғд, Раиси Федератсияи футболи вилоят Раҷаб Аҳмадзода бо ҳайат ва намояндагони дастаҳои Лигаи олӣ ва Лигаи якум баргузор гардид.

Дар ҷараёни мулоқот масъалаҳои марбут ба вазъи кунунии дастаҳо, омодагӣ ба марҳилаи дуюми Чемпионати ҷумҳуриявӣ ва роҳҳои баланд бардоштани сатҳи касбии бозигарон мавриди баррасӣ қарор гирифтанд. 

Раҷаб Аҳмадзода зимни суханронӣ иброз дошт, ки дастгирии соҳаи варзиш, аз ҷумла футболи касбӣ, яке аз самтҳои муҳими фаъолияти роҳбарияти Федератсияи футболи Тоҷикистон маҳсуб ёфта, барои рушди он шароити мусоид фароҳам оварда мешавад.

Раиси вилоят ба масъулини соҳа ҷиҳати ҳалли муаммоҳои ҷойдошта ва беҳтар гардондани инфрасохтори варзишӣ дастуру супоришҳои мушаххас дода, иброз дошт, ки дар сурати татбиқи саривақтии нақшаҳои тасдиқшуда натиҷаҳои назаррас ба даст оварда хоҳанд шуд.