30 декабр бо ибтикори мақомоти иҷроияи ҳокимияти давлатии вилоят дар шаҳри Хуҷанд ярмарка-фурӯши маводи ғизоӣ ташкил карда шуд. 

Ярмарка-фурӯши маводи ғизоӣ дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади пешгирии баландшавии арзиши маҳсулот ва бахшида ба Соли нави мелодӣ ташкил шуда, маҳсулоти нисбат ба бозор арзонтар пешниҳоди сокинон гардонда шуд.

Дар ярмарка тамоми маҳсулоти зарурии рӯзгор ба фурӯш гузошта шуд, ки Раиси вилояти Суғд Раҷаббой Аҳмадзода аз растаҳои фурӯш боздид намуд.

Бояд қайд намуд, ки бахшида ба Соли нави мелодӣ дар ҳамаи шаҳрҳои саноатии вилоят ярмарка-фурӯши маҳсулоти кишоварзӣ ва саноатӣ доир шуд. 

30 декабр Раиси вилояти Суғд Раҷаббой Аҳмадзода ба қисмҳои низомии мустақар дар шаҳри Бӯстон ва ноҳияи Бобоҷон Ғафуров ташриф оварда, афсарону сарбозонро бо Соли нави мелодӣ табрик кард.

Раиси вилоят дар суҳбат бо афсарону сарбозон изҳор дошт, ки бо дастгириҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қисмҳои ҳарбӣ беҳтарин шароит фароҳам оварда шудааст. 

Таъкид шуд, ки дар солҳои соҳибистиқлолӣ Қувваҳои Мусаллаҳи Ҷумҳурии Тоҷикистон ба нерӯи бузург табдил ёфта, мардум ба он боварӣ доранд. Ҳифзи дастовардҳои даврони истиқлол вазифаи ҷонии ҳар як сарбоз буда, хизматчиёни ҳарбӣ борҳо собит намудаанд, ки вазифаи муқаддаси худро сарбаландона иҷро карда метавонад. 

Раҷаббой Аҳмадзода илова намуд, ки мақомоти иҷроияи ҳокимияти давлатии вилоят бо истифода аз тамоми имкониятҳо барои боз ҳам беҳтар шудани шароит дар қисмҳои низомӣ мунтазам чораҷуӣ менамояд. 

Имрӯз Раиси вилояти Суғд Раҷаббой Аҳмадзода ба Раёсати Қӯшунҳои сарҳадии КДАМ ҶТ дар вилояти Суғд ташриф оварда, марзбонони шуҷоъи Ватанро бо фарорасии Соли нави мелодӣ табрик намуд.

Раиси вилояти Суғд Раҷаббой Аҳмадзода зимни суҳбат зикр дошт, ки ба шарофати сиёсати дурбинона ва оқилонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз дар мамлакат рушди соҳаҳои иқтисодиву иҷтимоӣ таъмин шуда, сатҳи зиндагии мардум беҳтар гардидааст. 

Барои хизматчиёни ҳарбӣ низ беҳтарин шароити кору хизмат фароҳам оварда шуда, танҳо дар соли ҷорӣ 75 дидбонгоҳи сардҳадӣ бунёд карда шудааст. 

Бо беҳтарин шароити зиндагиву хизмат таъмин намудани хизматчиёни ҳарбии Қувваҳои Мусаллаҳ, омода кардани кадрҳои баландихтисос, такмил додани дониши тахассусӣ ва сатҳи касбияти ҳайати шахсии ҷузъу томҳо, боз ҳам баланд бардоштани ҳисси масъулиятшиносӣ ва ватандӯстиву ватанпарастии афсарону сарбозон аз қабили дигар тадбирҳо мебошанд. 

Раиси вилояти Суғд Раҷаббой Аҳмадзода ва роҳбарияти РВКД ҶТ дар вилоят ба қисми низомии 3501-и Қӯшунҳои дохилии ВКД ҶТ дар шаҳри Хуҷанд ташриф оварда, сарбозону афсаронро бо Соли нави мелодӣ табрику таҳният намуданд.

Раҷаббой Аҳмадзода ҳайати шахсии қисми низомиро аз номи Сарфармондеҳи Олии Қувваҳои Мусаллаҳ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Соли нави мелодӣ табрик гуфт.

Қайд карда шуд, ки бо иродаи қавии мардуми соҳибмаърифату куҳанбунёдамон дар сарзамини аҷдодиамон сулҳу оромӣ ва суботи сиёсӣ ҳукмрон аст ва сокинони мамлакат ба хотири ояндаи неки Ватан сарҷамъу аҳлона заҳмат мекашанд.

Изҳори боварӣ карда шуд, ки ҷавонони ғаюру далер ва ватандӯсту ватанпарвари тоҷик якҷо бо мардуми ободгару ҳимматбаландамон минбаъд низ ба хотири ҳимояи истиқлолияту озодӣ, таҳкими пояҳои давлатдории миллӣ, густариши ҳисси баланди миллӣ, худшиносиву худогоҳӣ, муаррифии шоистаи Тоҷикистон дар арсаи байналмилалӣ, рушди иқтисодиёту иҷтимоиёт, фарҳангу маърифат ва умуман, пешрафти Ватани маҳбубамон саъю талош хоҳанд кард.