Дар доираи ҳаракати ҷумҳуриявии ниҳолшинонӣ рӯзи 28 январ дар шоҳроҳи Гулистон-ноҳияи Бобоҷон Ғафуров ниҳолҳои ороишиву ҳамешасабз шинонида шуд. 

Дар маъракаи ниҳолшинонӣ Раиси вилояти Суғд Раҷаббой Аҳмадзода, роҳбарияти ноҳия, кормандони ташкилоту идораҳо иштирок намуданд. 

Дар ноҳия шинонидани ниҳолу дарахтони ҳамешасабз ва гулу буттаҳои ороишию мавсимӣ вусъат ёфта, масъулон азм доранд, ки соли ҷорӣ ҷиҳати таъмини иҷрои иҷрои Қарори Ҳукумати Ҷумҳурии Тоҷикистон дар бораи «Барномаи давлатии кабудизоркунии Ҷумҳурии Тоҷикистон барои давраи то соли 2040» 44 ҳазор бех дарахтони гуногун шинонанд.

27 январ Раиси вилояти Суғд Раҷаббой Аҳмадзода бо вазъи омодагии пойгоҳҳои обкашии ноҳияи Ҷаббор Расулов шинос гардида, барои тайёр намудани иншооти обрасонӣ ба мавсими нав дар назди масъулин вазифагузорӣ намуд.

Зимни боздид аз пойгоҳи обкашии «Деҳмой-1» иттилоъ дода шуд, ки он солҳои 60-уми қарни гузашта дар маҷрои дарёи Сир бунёд шудааст. 6 агрегати он ниёз ба таъмири пурра пайдо карда, ду агрегати дигар умуман фаъолият намекард. Аз ин сабаб дар самти обёрии заминҳои кишоварзӣ дар ҷамоатҳои деҳоти Деҳмой, Гулхона, Сомониён, Ғулакандоз ва қисман заминҳои ҳудуди деҳоти Ҳаёти нав аз танқисии оби полезӣ мушкил ба вуҷуд меомад.

Бо дастгирии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Ҷумҳурии Тоҷикистон пойгоҳи обкашии мазкур пурра таъмиру таҷдид карда шуда, муҳаррику дастгоҳҳои нав насб карда шуд, ки тавассути пойгоҳи обкашии «Деҳмой-1» айни ҳол 7885 гектар заминҳои кишоварзӣ дар ноҳияи Ҷаббор Расулов бо оби полезӣ таъмин карда мешавад.

Раиси вилояти Суғд Раҷаббой Аҳмадзода дар партави сиёсати инсондӯстонаи Пешвои миллат муҳтарам Эмомалӣ Раҳмон зимни сафари корӣ ба ноҳияи Ҷаббор Расулов калонсолонро аёдат кард.

Раиси вилоят аз ҷумла аз ҳоли собиқадори меҳнат Оля Махатова ва маъюби гуруҳи 2 Ашурҷон Қузиева хабар гирифта, ба онҳо кӯмакҳои моддӣ расонид. 

Оля Махатова солҳои зиёд дар соҳаи маориф кор карда, омӯзгори забони англисӣ буд ва имрӯз нафақахӯр мебошад. 

Ашурҷон Қузиева бошад маъюби гуруҳи 2 буда, бо ҳамроҳии писараш зиндагӣ мекунад.

27 январ Раиси вилояти Суғд Раҷаббой Аҳмадзода бо роҳбарону фаъолони ноҳияи Ҷаббор Расулов машварати корӣ доир намуд.

Раиси вилояти Суғд Раҷаббой Аҳмадзода дар оғози машварат иброз дошт, ки ҷиҳати расидан ба ҳадафҳои гузошташуда ва таъмини иҷрои дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бояд аз тамоми имкониятҳо истифода бурда, нишондиҳандаҳои иҷтимоию иқтисодӣ боз ҳам беҳтар карда шавад.

Тазаккур дода шуд, ки кишоварзӣ аз соҳаҳои рушдкарда дар ноҳия маҳсуб меёбад ва сокинони меҳнатқарин дар самти истифодаи замин таҷрибаи кофӣ доранд. Бо назардошти ин, зарур аст, ки ҳар як ваҷаб замин оқилона истифода гардад ва кишти зироатҳо дар асоси нақшаи тасдиқшуда ба роҳ монда шавад.