Бо мақсади фаровон гардондани бозори истеъмолӣ ва дастрасии сокинон ба маҳсулоти хушсифату арзон рӯзи 26 июл дар шаҳри Хуҷанд ярмарка-фурӯши маҳсулоти кишоварзӣ ва саноатӣ баргузор шуд.

Бино ба иттилои Сарраёсати кишоварзии вилояти Суғд дар ярмарка беш аз 130 тонна маҳсулоти гуногун ва 40 ҳазор дона тухм бо нархҳои нисбатан арзон ба сокинону меҳмонони шаҳр пешниҳод гардид. Мақсад аз баргузории чунин ярмаркаҳо танзими нархи маҳсулот, дастгирии кишоварзону истеҳсолкунандагон ва таъмини бозори истеъмолӣ бо маводи аввалия мебошад.

Раиси вилояти Суғд Раҷаб Аҳмадзода зимни боздид аз ярмарка ба масъулин дастур дод, ки назорат аз болои сифати маҳсулот ва нархгузории он пурзӯр карда шавад, то шаҳрвандон тавонанд бо нархи дастрас маҳсулоти мавриди ниёзи худро харидорӣ намоянд.

Бояд гуфт, ки ташкил ва баргузории чунин ярмаркаҳо дар шаҳрҳои саноатии вилояти Суғд ба ҳукми анъана даромада, аз аввали сол то имрӯз 30 маротиба баргузор гардидааст.

Раиси вилояти Суғд Раҷаб Аҳмадзода дар доираи сафари корӣ ба ноҳияи Бобоҷон Ғафуров аз раванди корҳои сохтмонӣ ва ободонӣ бахшида ба истиқболи 35-солагии Истиқлолияти давлатии Ҷумҳурии Тоҷикистон боздид ба амал овард.

Зимни боздид аз рафти корҳои навсозӣ дар бинои Қасри фарҳанги Ҷамоати деҳоти ба номи Дадобой Холматов иттилоъ дода шуд, ки иншооти мазкур бо иқдоми мақомоти иҷроияи маҳаллӣ аз навсозӣ ва обод карда мешавад. 

Фармоишгари иншоот Идораи сохтмони асосии мақомоти иҷроияи ҳокимияти давлатии ноҳияи Бобоҷон Ғафуров мебошад. 

Раиси вилоят ҷиҳати сари вақт ва бо сифати баланд ба анҷом расонидани корҳои сохтмонӣ ба масъулин дастуру супоришҳои мушаххас дод.

Кишоварзони ноҳияи Бобоҷон Ғафуров дар самти истифодаи самараноку мақсадноки замин таҷрибаи ғанӣ дошта, ҳамасола бо истеҳсоли маҳсулоти гуногуни кишоварзӣ дар таъмини бозори дохилӣ ва афзун гардонидани содироти маҳсулоти ватанӣ саҳми назаррас мегузоранд. 

Дар хоҷагиҳои деҳконии ба номи Турсунбой Қӯшатов ва Абдураҳим Ҷӯмаев фаъолияти кишоварзон намунавӣ арзёбӣ мешавад. 

Айни ҳол нашъунамои пахта ва рафти кишти такрорӣ дар ин ду хоҷагии пешқадам дар сатҳи қаноатбахш қарор дошта, аз заҳмати пайвастаи кишоварзон шаҳодат медиҳад. Ба иттилои масъулин, дар соли ҷорӣ дар ноҳияи Бобоҷон Ғафуров беш аз 7500 гектар пахта кишт шудааст. Ҳамзамон, дар масоҳати 3400 гектар кишти такрории зироатҳои гуногуни кишоварзӣ ба роҳ монда хоҳад шуд. 

Раиси вилояти Суғд Раҷаб Аҳмадзода зимни боздид аз хоҷагиҳо ба масъулин дастур дод, ки истифодаи оқилонаи замин, таъмини саривақтии оби полезӣ, иҷрои нақшаи кишти такрорӣ ва истеҳсоли маҳсулоти хушсифати кишоварзиро таъмин намоянд. Таъкид гардид, ки рушди устувори соҳа танҳо бо назорати доимӣ, татбиқи таҷрибаи пешқадам ва дастгирии деҳқонон имконпазир аст.

Масъулини Ҷамъияти дорои масъулияти маҳдуди “ММК Агро” тасмим гирифтаанд, ки бо ҷалби мутахассисони хориҷӣ ва истифодаи таҷрибаҳои пешрафтаи ҷаҳонӣ масоҳати гармхонаи худро зиёд намоянд. 

Тавре зимни боздиди Раиси вилояти Суғд Раҷаб Аҳмадзода аз ҶДММ "ММК Агро" иттилоъ дода шуд, дар масоҳати 5 гектар сохтмони гармхонаи муосир бо истифода аз технологияҳои пешрафта ба нақша гирифта шудааст. Маҳсулоти асосии ин гармхона — помидор, бодиринг, қаланфури булғорӣ, боимҷон ва навъҳои гуногуни кабудӣ мебошад, ки барои таъмини бозори дохилӣ бо маҳсулоти тару тоза нақши муҳим хоҳанд бозид.

Ба иттилои масъулин, шароити мусоиди табииву иқлимии минтақа имконият фароҳам меорад, ки парвариши маҳсулоти полезӣ дар гармхонаҳо дар тамоми фасли сол ба роҳ монда шавад.