Дар доираи омодагиҳо ба ҷашни 35-солагии Истиқлолияти давлатии Ҷумҳурии Тоҷикистон дар шаҳри Истиқлол корҳои зиёди ободониву созандагӣ амалӣ гардида истодааст. 

Раиси вилояти Суғд Раҷаб Аҳмадзода зимни сафари корӣ ба шаҳри Истиқлол бо сохтмони корхонаҳои саноатӣ шинос гардид. 

Бо сармоягузории Ширкати куҳӣ-саноатии Тоҷикистону Хитой корхонаи нави металлургӣ бо арзиши 50 миллион доллар сохта шуда истодааст. Дар ин корхона, ки ба коркарди мис, сурб, нуқра ва дигар металҳои қиматбаҳо машғул хоҳад шуд, наздики 300 нафар бо ҷойи кор ва маоши хуб таъмин мегарданд. 

Раиси вилоят зимни боздид аз корхонаи мазкур бар зарурати истифодаи самараноки иқтидорҳо, баланд бардоштани маоши кормандон ва анҷоми саривақтии лоиҳа таъкид намуд.

Ҳамзамон, корхонаи нави “Оҳаки Истиқлол”, ки дар майдони 55 ҳазор метри мураббаъ бо 55 миллион сомонӣ сармоягузорӣ сохта мешавад, барои то 200 нафар ҷойи корӣ муҳайё хоҳад кард. Иқтидори истеҳсолии ин корхона 100 ҳазор тонна оҳаксанг дар як сол буда, маҳсулоти он пурра барои содирот ба кишварҳои Ӯзбекистон ва Қазоқистон нигаронида шудааст.

Дар ноҳияи Ҷаббор Расулов ба корҳои ободониву созандагӣ таваҷҷуҳи хосса зоҳир карда шуда, ба истиқболи ҷашни 35-солагии Истиқлоли давлатии Ҷумҳурии Тоҷикистон як силсила иншооти муҳими иҷтимоӣ бунёд гардида истодааст. 

Тибқи нақша, то ҷашни таърихӣ дар ноҳия 600 адад иншооти гуногун бунёд ва мавриди истифода қарор дода мешаванд. То имрӯз 575 иншоот ба истифода супорида шудааст, ки 95,8 дарсади нақшаро ташкил медиҳад.

Раиси вилояти Суғд Раҷаб Аҳмадзода зимни боздиди корӣ аз рафти сохтмони як қатор иншооти муҳими ноҳия, аз ҷумла муассисаи таълимии хусусии “Пайравон”, бинои маъмурии Кумитаи иҷроияи ҲХДТ ва бинои нави шуъбаи маориф, таъкид намуд, ки сифати корҳои сохтмонӣ бояд дар мадди аввал қарор дошта бошад.

Раиси вилояти Суғд Раҷаб Аҳмадзода зимни сафари корӣ ба ноҳияи Ҷаббор Расулов бо тарзи истифодаи замин ва нашъунамои зироатҳои кишоварзӣ аз наздик шинос шуд.

Зикр гардид, ки дар нимсолаи аввали соли 2025 ҳаҷми истеҳсоли маҳсулоти кишоварзӣ дар ноҳия зиёда аз 339 миллион сомониро ташкил дода, ин нишондод нисбат ба ҳамин давраи соли гузашта 20 миллион сомонӣ зиёд мебошад. 

Раиси вилоят зимни боздид аз хоҷагии деҳқонии “Элбек” иброз дошт, ки истифодаи оқилонаву самараноки замин бояд ба як таҷрибаи умумӣ табдил ёбад. Соли ҷорӣ деҳқонони ин хоҷагӣ тавонистаанд аз як қитъа замин се ҳосил — помидор, қаланфури булғорӣ ва ҷуворимаккаро ба даст оранд, ки нишонаи муносибати хирадмандона бо замин ва меҳнати софдилонаи кишоварзон мебошад.

Раиси вилоят таъкид дошт, ки чунин таҷриба метавонанд ба таъмини бозори дохилӣ бо маҳсулоти тару тоза, беҳтар гардидани сатҳи зиндагии деҳконон ва рушди деҳот мусоидат намояд.

Дар доираи сафари корӣ ба ноҳияи Ҷаббор Расулов Раиси вилояти Суғд Раҷаб Аҳмадзода аз ҷараёни сохтмони ду фабрикаи парандапарварӣ — Ҷамъияти дорои масъулияти маҳдуди “Анқо тнвест” ва ҶДММ “Корвон раранда” боздид ба амал овард.

Тибқи иттилои масъулин, корҳои сохтмонӣ дар иншоотҳо ба марҳилаи анҷомёбӣ расида, дар ояндаи наздик мавриди истифода қарор хоҳанд гирифт. Бунёди фабрикаҳо имкон медиҳад, ки бозори дохилӣ бо гӯшту тухми мурғи истеҳсоли ватанӣ таъмин ва садҳо ҷойи нави корӣ барои сокинони маҳаллӣ фароҳам гардад.

Раиси вилоят зимни шиносоӣ баён дошт, ки рушди соҳаи парандапарварӣ аз самтҳои афзалиятноки иқтисодиёти ноҳия ба ҳисоб рафта, барои расидан ба ҳадафҳои стратегӣ, аз ҷумла таъмини амнияти озуқаворӣ, зарур аст, ки технологияҳои муосир ҷорӣ, таҷрибаи пешрафтаи ҷаҳонӣ истифода ва сармояи хусусӣ ҷалб карда шавад.