Ноҳияи Бобоҷон Ғафуров аз ҷумлаи навоҳии бузурги кишоварзӣ маҳсуб ёфта, ба масъалаи кишт, истеҳсол ва коркарди пахта таваҷҷуҳи хоса зоҳир карда мешавад.

Раиси вилояти Суғд Раҷаб Аҳмадзода зимни сафари корӣ ба ноҳия бо фаъолияти ҶДММ «Зафариён» шинос гардид. Аснои мулоқот бо масъулини ноҳия ва роҳбарони корхонаҳои пахтатозакунӣ таъкид гардид, ки пахта бояд пурра ҷамъоварӣ ва коркард карда шавад.

Иттилоъ дода шуд, ки ҶДММ «Зафариён» дар мавсими ҷорӣ 5000 тонна пахтаро қабул ва коркард менамояд. Айни замон дар корхона 35 нафар ба фаъолият машғуланд ва бо афзоиши ҳаҷми ҳосил шумораи кормандон то ба 60 нафар хоҳад расид. 

Соли равон кишоварзони ноҳияи Бобоҷон Ғафуров ният доранд, ки бо ҷамъоварии пурра ва саривақтии ҳосил нақшаи истеҳсолиро барзиёд иҷро намоянд. 

Дар ноҳияи Бобоҷон Ғафуров бо мақсади таъмини рушди соҳаи саноат бунёди иқтидорҳои нави истеҳсолӣ идома дорад. 

Раиси вилояти Суғд Раҷаб Аҳмадзода зимни боздиди корӣ бо сохтмони як қатор корхонаҳои саноатӣ шинос гардид.

Дар ноҳияи бо ташаббуси ҶДММ «Хишти Ором» корхонаи нави хиштбарорӣ бо истифода аз технологияҳои муосир бунёд мешавад. Ин иқдом на танҳо ҳаҷми истеҳсолро меафзояд, балки ҷойҳои нави кориро низ фароҳам меорад. 

Ба роҳбари вилоят иттилоъ дода шуд, ки ин корхона яке аз калонтарин корхонаҳои истеҳсоли хишт дар минтақа хоҳад буд, ки бо иштироки соҳибкорони ватанӣ ва ҳамкорӣ бо мутахассисони чинӣ ташкил ёфтааст.

Ҳамзамон, ҶДММ «Зартахта» сохтмони корхонаи истеҳсоли масолеҳи ороишӣ ва сохтмониро идома медиҳад, ки бо технологияи пешрафта муҷаҳҳаз гардида, ба баланд бардоштани сифати маҳсулот мусоидат хоҳад кард. 

Дар ноҳияи Бобоҷон Ғафуров ба истиқболи ҷашни 35-солагии Истиқлоли давлатии Ҷумҳурии Тоҷикистон корҳои созандагиву бунёдкорӣ бо маром идома доранд.

Раиси вилояти Суғд Раҷаб Аҳмадзода зимни сафари корӣ ба ноҳия бо ҷараёни таҷдиду навсозии як қатор иншооти муҳими иҷтимоӣ шинос шуд.

Нахуст роҳбари вилоят аз раванди корҳои таъмиру сохтмон дар бинои қасри фарҳанг ва филиали литсейи касбӣ-техникии рақами 75, воқеъ дар Ҷамоати деҳоти Дадобой Холматов боздид ба амал овард. Зикр гардид, ки биноҳои мазкур солҳои тӯлонӣ бекорхобида буданд ва ҳоло бо маблағгузории мақомоти иҷроияи ҳокимияти давлатии ноҳияи Бобоҷон Ғафуров азнавсозӣ мешаванд. Айни замон дар қасри фарҳанг беш аз 30 нафар сохтмончиён машғули коранд.

Дар ноҳияи Мастчоҳ бо мақсади фароҳам овардани шароити арзандаи зиндагӣ ва рафтуомади сокинону мусофирон аз аввали соли равон даҳҳо километр роҳҳои мошингарду дохили маҳаллаҳо мумфарш карда шудааст. 

Дар идомаи корҳои ободониву созандагӣ бо иштироки Раиси вилояти Суғд Раҷаб Аҳмадзода мумфаршкунии роҳи кӯчаи “40-солагии Дилварзин”, воқеъ дар деҳоти Палдораки ноҳия оғоз ёфт. 

Иттилоъ дода шуд, ки роҳи мазкур бо саҳми сокинону соҳибкорон бо дарозии 600 метр ва паҳноии 6 метр мумфарш карда мешавад.

Раиси вилоят зимни оғози корҳои мумфаршкунӣ таъкид намуд, ки Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон барои фароҳамсозии шароити арзанда ба мардум пайваста тадбирҳои зарурӣ меандешад. Ҳамзамон зикр гардид, ки саҳми бевоситаи сокинону соҳибкорон дар амалисозии корҳои хайру савоб назаррас буда, имрӯзҳо дар саросари вилоят бо ташаббуси мардум садҳо километр роҳҳои деҳот мумфарш шуда истодааст.