Дар толори хурди Мақомоти иҷроияи ҳокимияти давлатии вилояти Суғд машварати кории Раиси вилояти Суғд Раҷаббой Аҳмадзода баргузор гардид. 

Дар машварат, ки бо иштироки комиссари ҳарбии вилоят, роҳбарони сохторҳои дахлдори вилоятӣ, раисони шаҳру ноҳияҳо, раисони комиссияи давъатии шаҳру навоҳӣ, комиссарони ҳарбии шаҳру ноҳияҳо доир шуд, масъалаи омодагӣ ба даъвати баҳории ҷавонон ба артиш баррасӣ гардид.

Зимни баррасии масъалаи мазкур ба масъулин ҷиҳати сари вақт иҷро намудани нақшаи ҷалби ҷавонон ба мактабҳои ронандагии Ташкилоти ҷамъиятии мададгори мудофиа, назорати ташкили корҳо оид ба муташаккилона гузаронидани маъракаи даъвати ҳарбӣ ва бақайдгирии ҷавонони синну соли даъватӣ, омодагӣ барои муташаккилона гузаронидани маъракаи даъвати баҳории ҷавонон ба сафи Қувваҳои Мусаллаҳ, дар руҳияи ватандӯстӣ ва эҳтиром ба арзишҳои милливу давлатӣ тарбия намудани наврасону ҷавонон супоришҳои мушаххас дода шуд.

30 январи соли 2025 дар майдони назди Театри мазҳака ва мусиқии ба номи Камоли Хуҷандӣ бахшида ба Иди Сада чорабинӣ баргузор гардид.

Дар чорабинии идона аз ҷониби шаҳру ноҳияҳо ва ташкилоту идораҳо хаймаҳо ороста шуда, ҷашни аҷдодӣ бо риоияи анъанаву суннатҳои қадима таҷлил карда шуд. 

Раиси вилояти Суғд Раҷаббой Аҳмадзода бо ҳамроҳии меҳмонон аз ҷумҳуриҳои Ӯзбекистон ва Қирғизистон ба идгоҳ ташриф овард.

Таъкид гардид, ки ҷашни Сада аз қадимулайём бо табиат, заминдорӣ ва касбу кори гузаштагонамон пайванди қавӣ дошта, ҳамчун ҷузви фарҳанги маънавии халқи тоҷик дар тӯли қарнҳо барои муаррифии мардуми соҳибтамаддуну куҳанбунёдамон ва ҳифзи беҳтарин арзишу суннат ва расму ойинҳои миллӣ нақши арзишманд гузоштааст.

29 январ Раиси вилояти Суғд Раҷаббой Аҳмадзода дар ноҳияи Зафаробод бо ҷараёни корҳои ободониву созандагӣ шинос гардид.

Ноҳияи Зафаробод бо шарофати Истиқлоли давлатӣ ва таваҷҷуҳу ғамхориҳои пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ободу зебо гардида, бо бунёди иншооти таъиноти гуногун ҷойҳои нави корӣ ташкил ва шароити арзандаи кору зиндагӣ ба сокинон фароҳам гардид.

Ба истиқболи ҷашни 35-солагии Истиқлоли давлатӣ дар ноҳия бунёду таҷдид ва навсозии қариб 600 иншоот ба нақша гирифта шуда, то имрӯз беш аз 440 иншоот бо харҷи қариб 110 миллион сомонӣ ба истифода дода шудааст.

Дар ноҳияи Зафаробод ба масъалаи сари вақт омода намудани пойгоҳҳои обкашӣ ва дигар иншооти обрасон ба мавсими киштукор таваҷҷуҳ равона шуда, бо ин мақсад аз ҷониби Мақомоти иҷроияи ҳокимияти давлатии вилояти Суғд маблағҳои зарурӣ ҷудо гардидааст.

Зимни боздид аз пойгоҳҳои обкашии ноҳия Раиси вилояти Суғд Раҷаббой Аҳмадзода таъкид намуд, ки дар асоси дастуру супоришҳои Пешвои миллат муҳтарам Эмомалӣ Раҳмон таъминоти оби полезӣ дар ноҳияи Зафаробод имсол боз ҳам беҳтар гардида, заминҳои корам самаранок истифода карда мешаванд.

Масъулини Идораи давлатии беҳдошти замин ва обёрӣ, Раёсати кишоварзӣ ва масъулини мақомоти маҳалли ҳокимияти давлатӣ вазифадор гардиданд, ки дар самти таъмири каналҳо, сари вақт тоза намудани заҳбуру заҳкаш тадбирҳои зарурӣ андешанд.