Дар машварати августии соҳаи маорифи вилояти Суғд бо иштироки Раиси вилоят Раҷаб Аҳмадзода ва вазири маориф ва илми Ҷумҳурии Тоҷикистон Раҳим Саидзода гурӯҳи омӯзгорон ва хонандагон барои дастовардҳои арзандаашон қадрдонӣ шуданд.

Аз ҷумла, 37 нафар омӯзгор, ки барои омода намудани хонандагон ба олимпиадаҳои ҷумҳуриявию байналмилалӣ саҳми калон гузоштаанд, бо сипоснома ва мукофотҳои пулӣ сарфароз гардиданд.

Ҳамчунин, 21 нафар хонанда, ки дар соли таҳсили 2024-2025 дар олимпиадаҳои фаннии сатҳи ҷумҳуриявӣ ва байналмилалӣ ҷойҳои ифтихориро ишғол кардаанд, бо мукофотҳои пулӣ ва туҳфаҳо қадрдонӣ шуданд.

Ғайр аз ин, 5 нафар иштирокчии хурди озмуни вилоятии «Ахтарони дониш» низ бо туҳфаҳои пулӣ қадрдонӣ гардиданд. 

23 августи соли 2025 дар Кохи фарҳанги ба номи Абуабдуллоҳи Рӯдакӣ машварати августии кормандони соҳаи маорифи вилояти Суғд баргузор гардид. 

Дар машварат Раиси вилояти Суғд Раҷаб Аҳмадзода, вазири маориф ва илми Ҷумҳурии Тоҷикистон Раҳим Саидзода, муовинони Раиси вилоят, муовинони раисони шаҳру ноҳияҳо, намояндагони муассисаҳои таҳсилоти олӣ ва миёнаи касбӣ, директорони муассисаҳои таълимӣ, омӯзгорон ва собиқадорони соҳа иштирок намуданд.

Раиси вилоят ва вазири маориф ва илм пеш аз оғози машварат бо ғолибони олимпиадаҳои байналмилалӣ ва омӯзгорони онҳо мулоқот намуда, ба онҳо мукофотҳои пулии мақомоти иҷроияи ҳокимияти давлатии вилоятро тақдим карданд. Ҳамчунин, меҳмонон бо намоиши дастовардҳои муассисаҳои таълимӣ дар озмунҳои ҷумҳуриявӣ ва маҳаллии соҳаи маориф, аз ҷумла, “Фурӯғи субҳи доноӣ китоб аст”, “Илм – фурӯғи маърифат”, “Ихтироъкорон ва навоварон”, “Мураббии соли Тоҷикистон” ва “Омӯзгори соли Тоҷикистон” шинос шуданд. Дар ин рӯз, собиқадорони соҳаи маориф низ бо мукофотҳои пулии мақомоти иҷроияи ҳокимияти давлатии вилоят қадрдонӣ гардиданд.

Дар ноҳияи Ҷаббор Расулов бахшида ба ҷашни 35-солагии Истиқлоли давлатӣ корҳои созандагиву бунёдкорӣ бо маром идома дорад.

Раиси вилояти Суғд Раҷаб Аҳмадзода зимни сафари корӣ бо ҷараёни татбиқи ҳадафҳои созанда, бунёди корхонаҳои нав фаъолияти гармхона ва хоҷагиҳои моҳипарварӣ шинос шуд.

Дар Ҷамъияти дорои масъулияти маҳдуди “Анқо-инвест” имконият фароҳам оварда шудааст, ки то 150 ҳазор сар парранда парвариш карда шавад. Ҳамзамон, дар Ҷамъияти дорои масъулияти маҳдуди “Корвон парранда” истеҳсоли чӯҷа ба роҳ монда шудааст, ки иқтидори солонаи он то 3 миллион сарро ташкил медиҳад. Масъулин таъкид намуданд, ки дар оянда иқтидор ду баробар афзоиш меёбад. Айни ҳол дар ноҳия 6 корхонаи паррандапарварӣ фаъолият дошта, бо ба истифода додани иқтидорҳои нав ҳаҷми истеҳсоли гӯшт ва тухм боз ҳам зиёд хоҳад шуд.

Дар деҳоти Деҳмой роҳбари вилоят фаъолияти ҶДММ “Хайри сафо”-ро мавриди таваҷҷуҳ қарор дод. Дар инҷо дар масоҳати як гектар гармхона бунёд гардида, рӯзҳои наздик дар гармхона кишти бодиринг ба роҳ монда мешавад.

Соли ҷорӣ дар ноҳияи Ҷаббор Расулови вилояти Суғд беш аз 70 километр роҳҳои маҳаллӣ мумфарш карда шудааст. Дар ин бора зимни боздиди кории Раиси вилояти Суғд Раҷаб Аҳмадзода аз ноҳияи Ҷаббор Расулов иттилоъ дода шуд. 

Дар асоси дастуру ҳидоятҳои Пешвои миллат муҳтарам Эмомалӣ Раҳмон бо саҳмгузории фаъолонаи сокинон дар деҳаҳои ноҳияи Ҷаббор Расулов мумфаршкунии роҳҳо вусъат ёфта, сокинон ободониро амри зарурӣ ва нишонаи ватандӯстӣ арзёбӣ намуда, бо ҳисси баланди масъулият дар ободонии маҳал саҳм мегузоранд. 

Бо иштироки Раиси вилояти Суғд Раҷаб Аҳмадзода дар деҳоти Ғулакандоз ба мумфаршкунии кӯчаҳо оғоз бахшида шуд. 

Сокинони деҳаи Сомониён низ тасмим гирифтаанд, ки зиёда аз 15 километр роҳҳои ҳудуди маҳалро пурра мумфарш намоянд. Маросими оғози корҳои мумфаршкунӣ дар кӯчаи ба номи Абдулло Пӯлотов бо иштироки роҳбари вилоят доир гардид. Таъкид шуд, ки ободии ҷомеа аз хона, маҳалла ва деҳа оғоз мегардад. Бо дарки ин нукта сокинон дар иҷрои корҳои ободонӣ фаъолона иштирок намуда истодаанд.