18 майи соли 2025 дар шаҳру ноҳияҳои вилояти Суғд бо иштироки 100 ҳазор нафар сокинони касбу кори гуногун Дави миллӣ ва марафони велосипедронӣ баргузор гардид.

Дар маркази вилоят-шаҳри Хуҷанд дар чорабинии варзишӣ беш аз 25 000 нафар ҷавонону наврасон, кормандони ташкилоту муассисаҳо, варзишгарон ва дӯстдорони тарзи ҳаёти солим иштирок карданд.

Раиси вилояти Суғд Раҷаббой Аҳмадзода зимни суханронӣ баргузории чунин чорабиниҳои оммавии варзиширо рамзи иттиҳоду сарҷамъӣ, солимии ҷомеа ва нишонаи пуштибонии мардуми кишвар аз сиёсати варзишпарваронаи Пешвои миллат муҳтарам Эмомалӣ Раҳмон арзёбӣ кард.

Таъкид гардид, ки баргузории Дави миллӣ ба анъанаи нек мубаддал гашта, он ҳамасола бо шукӯҳу шаҳомати хоса доир мегардад.

Кишоварзони ноҳияи Спитамен, ки аз минтақаҳои пахтакори вилояти Суғд ба ҳисоб меравад, соли равон бо истифода аз имкониятҳои мавҷуда, тухмиҳои ба иқлими маҳаллӣ мутобиқ ва татбиқи босамари корҳои агротехникӣ ният доранд ҳосили фаровону босифат ба даст орад.

Раиси вилояти Суғд Раҷаббой Аҳмадзода зимни боздид аз заминҳои кишоварзии Ҷамъияти дорои масъулияти маҳдуди “Спитамен текстайлз”, воқеъ дар Ҷамоати деҳоти Куруш бо вазъи нашъунамои пахта шинос гардид. 

Тавре иттилоъ дода шуд, соли равон аз ҷониби ин ширкат дар масоҳати 2200 гектар кишти пахта ба роҳ монда шуда, нашъунамои зироат қаноатбахш арзёбӣ мегардад. Масъулони ширкат бо мақсади баланд бардоштани ҳосилнокӣ аз тухмиҳои хушсифату ба маҳал мувофиқ истифода бурда, корҳои агротехникиро сари вақт иҷро намуда истодаанд.

15 май Раиси вилояти Суғд Раҷаббой Аҳмадзода аз ҳоли якчанд оилаи барӯманди шаҳри Хуҷанд хабар гирифта, онҳоро бо Рӯзи байналмилалии оила табрик намуд.

Раиси вилоят бо оилаҳои Усмоновҳо (Ҳалим Усмонов ва Муборак Усмонова), Абдуллоевҳо (Баҳодур Абдуллоев ва Ҳабиба Ҳакимова) ва Неъматовҳо (Ҷӯрабой Неъматов ва Биҳоҷал Раҳимова) мулоқот анҷом дод.

Раҷаббой Аҳмадзода зимни суҳбат таъкид дошт, ки оила пояи устувори ҷомеа ба шумор рафта, дар нигоҳдории арзишҳои инсонӣ, тарбияи фарзандон ва рушди иҷтимоӣ нақши калидӣ мебозад. Раиси вилоят ҳамчунин аз суханони Пешвои миллат муҳтарам Эмомалӣ Раҳмон ёдоварӣ намуда, изҳор дошт, ки давлат оиларо ҳамчун асоси ҷамъият ҳифз ва пуштибонӣ мекунад.

Дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Истаравшан ба масъалаи рушди соҳаи маориф, махсусан бунёди муассисаҳои таълимии нав ва фарогирии бештари кӯдакон ба таълиму тарбия, таваҷҷуҳи хоса зоҳир мегардад.

Бо дастгирии Мақомоти иҷроияи ҳокимияти давлатии вилояти Суғд дар шаҳр сохтмони 4 муассисаи таълимӣ ба роҳ монда шуда, инчунин бо мусоидати мақомоти маҳаллӣ ва саҳмгузории соҳибкорону шахсони саховатманд бунёди 13 мактаби нав ба роҳ монда шудааст. Илова бар ин, барои фарогирии бештари кӯдакон ба таълиму тарбияи томактабӣ сохтмони кӯдакистонҳо низ дар назар аст.