Дар хоҷагиҳои деҳқонии Конибодом кишти пахта оғоз ёфт

Наврӯз дар фарҳанги миллати тоҷик ҳамеша рамзи рӯзи нав, оғози кишту кор ва пайванди инсону табиат буда, бо фарорасии баҳор мардум донаи умед ба хок мепошад. Дар арафаи иди байналмилалӣ кишоварзони шаҳри Конибодом ба кишти пахта оғоз бахшида, бо руҳияи болида ба корҳои саҳроӣ шуруъ намуданд.

18 март Раиси вилояти Суғд Раҷаббой Аҳмадзода дар хоҷагии деҳқонии «Дурахшон»-и Ҷамоати деҳоти ба номи Абулқосим Лоҳутӣ ва хоҷагии деҳқонии ба номи «Махкамов»-и Ҷамоати деҳоти Куҳандиёр ба кишти пахта оғоз бахшид. Дар суҳбат бо кишоварзон роҳбари вилоят фарорасии Иди байналмилалии Наврӯзро табрик намуда, қайд намуд, ки​ Наврӯз ҳамчун падидаи беназири фарҳангӣ ҳамеша мардумро ба бунёдкорию созандагӣ ҳидоят намудааст. Раиси вилоят ҳамзамон ба кишоварзон тавсия дод, ки ҳар порча заминро самаранок истифода бурда, кишти зироатҳо, аз ҷумла пахтаро дар вақти муайяншуда ба анҷом расонанд.

Раиси вилоят дар Конибодом собиқадорони меҳнатро аёдат намуд

18 март Раиси вилояти Суғд Раҷаббой Аҳмадзода дар шаҳри Конибодом собиқадорони меҳнатро аёдат намуд.

Раиси вилоят оилаи иштирокчии Ҷанги Бузурги Ватанӣ, сокини деҳоти Фирӯзоба Маъруфа Набиева ва қаҳрамони меҳнати сотсиалистӣ Каромат Шарифоваро аёдат намуда, фарорасии Иди байналмилалии Наврӯзро ба онҳо табрик гуфт. Қайд карда шуд, ки дар рӯзҳои таҷлили иди​ Наврӯз, ки ҳамчун падидаи беназири фарҳангӣ дар сарнавишти миллати тоҷик ва дигар меросбарони ин ганҷинаи бебаҳои бостонӣ ҷойгоҳи хоса дорад, аёдати калонсолон анъанаи неки миллӣ маҳсуб меёбад.

Иштироки Раиси вилоят дар тантанаҳои наврӯзии сокинони деҳоти Фирӯзобаи шаҳри Конибодом

18 март Раиси вилояти Суғд Раҷаббой Аҳмадзода ба шаҳри Конибодом омада, дар чорабиниҳои наврӯзии сокинони деҳоти Фирӯзоба ширкат варзид.

Сокинони деҳоти Фирӯзоба ҳар сол аз аввалинҳо шуда Наврӯзи хуҷастапайро бо риояи тамоми суннату анъанаҳои миллӣ таҷлил менамоянд. Имсол низ аҳолии ин минтақа бо омода намудани суманак, оростани хаймаҳои наврӯзӣ ва намоиши маҳсулоти ҳунарҳои мардумӣ, таому хуришҳои миллӣ ба истиқболи иди баҳор омода шуда, аҳлонаву сарҷамъ ва бо шукргузорӣ аз фазои орому осудаи Ватан Наврӯзро ҷашн гирифтанд.

Баргузории иҷлосияи чордаҳуми Маҷлиси вакилони халқи вилояти Суғд, даъвати шашум

17 марти соли 2023 дар толори мақомоти иҷроияи ҳокимияти давлатии вилоят таҳти раёсати Раиси вилояти Суғд, Раиси Маҷлиси вакилони халқи вилоят Раҷаббой Аҳмадзода​ иҷлосияи чордаҳуми Маҷлиси вакилони халқи вилояти Суғд, даъвати шашум баргузор гардид.

Ба рӯзномаи иҷлосия масъалаҳои​ эътироф намудани ваколати вакилии вакилони интихобшудаи Маҷлиси вакилони халқи вилояти Суғд, даъвати шашум аз ҳавзаҳои интихоботии ҷудогона,​ рафти иҷрои қарори Ҳукумати Ҷумҳурии Тоҷикистон аз 31 декабри соли 2020, №702 “Дар бораи Барномаи тайёр намудани кадрҳои тиббӣ барои давраи то соли 2030”,​ ҳисоботи комиссияи доимии Маҷлиси вакилони халқи вилояти Суғд оид ба масъалаҳои сохтмон, саноат, нақлиёту алоқа, хоҷагии роҳ ва хоҷагии рифоҳӣ, ҳисоботи вакили Маҷлиси вакилони халқи вилоят аз ҳавзаи интихоботии «Моғиён», №26 оид ба иҷрои ваколати вакилӣ,​ пеш аз муҳлат қатъ намудани ваколати вакилии вакили Маҷлиси вакилони халқи вилоят, даъвати шашум дар ҳавзаи интихоботии алоҳида,​ ворид намудани тағйиру иловаҳо ба қарорҳои Маҷлиси вакилони халқи вилояти Суғд, даъвати шашум,​ номгузории объектҳои физикию ҷуғрофӣ, тасдиқи қарорҳои Раиси вилояти Суғд ва ғайраҳо пешниҳод гардида, аз ҷониби вакилон қарорҳои дахлдор қабул гардид.

Шиносоӣ бо фаъолияти хоҷагиҳои ниҳолпарварӣ ва ифтитоҳи хатти оби нӯшокӣ дар деҳоти Сабристон

Раиси вилояти Суғд Раҷаббой Аҳмадзода дар деҳаи Ругунди Ҷамоати деҳоти Сабристони шаҳри Истаравшан бо фаъолияти хочагиҳои ниҳолпарварӣ шинос шуд.

Ҷамоати деҳоти Сабристон яке аз сернуфузтарин деҳот маҳсуб ёфта, дар қаламрави он 1550 хоҷагии деҳқонӣ амал менамояд. Дар хоҷагиҳои ниҳолпарварии ҷамоат соли ҷорӣ бештар аз 1 млн. бех ниҳолҳои мухталиф барои фурӯш омода карда шудааст. Ниҳолпарварони ҷамоат таҷрибаи бой дошта, боғдорони шаҳри Истаравшан ва ноҳияҳои Деваштичу Шаҳристонро низ бо ниҳолҳои гуногун таъмин менамоянд.