Пешвои миллат Эмомалӣ Раҳмон Прокурори генералии Федератсияи Русия Игор Красновро ба ҳузур пазируфтанд

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Прокурори генералии Федератсияи Русия Игор Красновро, ки бо сафари корӣ ба Тоҷикистон ташриф овардааст, ба ҳузур пазируфтанд.

Дар рафти мулоқот доираи васеи масъалаҳои вобаста ба таъмини амният ва ҳамкории ҳуқуқӣ дар чорчӯби шарикии стратегии Тоҷикистон ва Русия баррасӣ гардид.

Ташкили ярмарка-фурӯши маҳсулоти кишоварзӣ

Имрӯз бо ибтикори мақомоти иҷроияи ҳокимияти давлатии вилояти Суғд ва бо мақсади таъмини дастрасии мардум ба маҳсулоти хушсифату нисбатан арзон ярмарка-фурӯши маҳсулоти кишоварзӣ ташкил карда шуд.

Раиси вилояти Суғд Раҷаббой Аҳмадзода аз ярмаркаи мазкур боздид намуда, иброз дошт, ки ташкили ярмарка-фурӯши маводи ғизоӣ ҷиҳати таъмини иҷрои дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ шуда, чунин иқдомҳо минбаъд низ амалӣ карда мешавад.

Собиқадорони меҳнат аёдат карда шуданд

22 июл Раиси вилояти Суғд Раҷаббой Аҳмадзода дар ноҳияи Мастчоҳ собиқадорони меҳнатро аёдат кард.

Раиси вилоят ба манзили Ҷумаев Абдуқаюм ва Сангинов Азим омада, бо пирони кор сӯҳбати самимӣ анҷом дод. Аснои суҳбат роҳбари вилоят аз саҳми собиқадорон дар рушди ҷомеа ва таваҷҷуҳи пайвастаи Пешвои миллат муҳтарам Эмомалӣ Раҳмон нисбат ба собиқадорон ёдоварӣ кард.

Шиносоӣ бо фаъолияти хоҷагиҳои деҳқонии ноҳияи Мастчоҳ

Дар ноҳияи Мастчоҳ Раиси вилояти Суғд Раҷаббой Аҳмадзода бо фаъолияти хоҷагиҳои деҳқонӣ шинос шуда, барои ҷамъоварии ҳосили пухтарасида ва гузаронидани кишти такрорӣ ба масъулин супоришҳо дод.

Раиси вилоят рафти ҷамъоварии полезиҳо, нашъунамои пахта, чормағзи заминӣ ва гузаронидани кишти такрориро мавриди таваҷҷуҳ қарор дод.

Фабрикаи ресандагии ноҳияи Мастчоҳ фаъол мешавад

Бо ташаббуси соҳибкорони тоҷику турк фабрикаи ресандагии ноҳияи Мастчоҳ (собиқ "Олимтекстайлз") ба кор андохта мешавад. Дар ин бора зимни боздиди Раиси вилояти Суғд Раҷаббой Аҳмадзода аз ин корхона иттилоъ дода шуд.

Тибқи иттилои масъулин айни замон корҳои омодагӣ ва таҷдиду навсозии хатҳои технологӣ ҷараён дошта, дар мавсими имсолаи ҷамъоварии пахта корхона фаъолияти худро дар се баст ба роҳ мемонад. Дар корхона коркарди нахи пахта ба роҳ монда шуда, соҳибкорони тоҷику турк ният доранд, ки дар оянда маҳсулоти таёр истеҳсол намоянд. Дар фабрикаи ресандагӣ мутахассисони ҷавон ба кор қабул карда шуда, аз ҳисоби корхона аз омӯзиш мегузаранд. Дар назар аст, ки 300 бо ҷойи корӣ ва маоши баланд таъмин шаванд.