Боздиди Раиси вилоят аз ҶДММ "Сирдарё"

Раиси вилояти Суғд Раҷаббой Аҳмадзода дар шаҳри Хуҷанд бо фаъолияти ҶДММ "Сирдарё" шинос гардид. 

Иттилоъ дода шуд, ки корхонаи «Сирдарё» соли 2009 таъсис ёфта, дар коркарди анвои гуногуни мева ва истеҳсоли маҳсулоти мевагӣ дар бозори истеъмолӣ мавқеи хос дорад.

Муассиси корхона бо роҳандозии хату таҷҳизоти муосири технологӣ, яъне истифодаи оқилонаи иншооти мавҷуда истеҳсоли ҳаҷму номгӯи зиёди маҳсулоти консервӣ аз меваю сабзавотро ба роҳ мондааст. Ин хатҳои технологии коркарди меваю сабзавот, рехтану банду басти маҳсулот ба зарфҳои шишагӣ, хатҳои технологии рехтан ва бандубасти маҳсулот ба зарфҳои тетрапаки ғунҷоишашон 200, 250 грамма, 1 литра ва коргоҳи истеҳсоли қуттиҳои қоғазию картонӣ ва ғайраҳо мебошанд.

Боздиди Раиси вилоят аз ноҳияи Ҷаббор Расулов

Дар минтақаи шафати роҳи оҳани ноҳияи Ҷаббор Расулов 8 маркази содироти маҳсулоти кишоварзӣ ташкил гардидааст ва ҳамарӯза аз ин ҷо ба хориҷи мамлакат тариқи роҳи оҳан ва мошинҳои калонҳаҷм пиёзи барвақтӣ интиқол дода мешавад. 

Тавре зимни шиносоии Раиси вилояти Суғд Раҷаббой Аҳмадзода иттилоъ дода шуд, барои иҷрои корҳо, ба монанди саракунӣ, банду басти маҳсулот ва пур кардани вагонҳо шумораи зиёди сокинони ноҳия бо шуғл ва маоши хуб таъмин гардида, барои соҳибкорону тоҷирон шароити мусид фароҳам оварда шудааст.

Содироти пиёзи барвақтӣ аз ин минтақа асосан аз 17 апрел оғоз гардида, ба таъкиди соҳибкорон рӯз то рӯз талабот ба пиёз ва дигар намуди маҳсулоти кишоварзии Тоҷикистон дар хориҷи мамлакат зиёд мегардад.

Раиси вилоят сарбозонро ба муносибати 30-солагии таъсисёбии Қӯшунҳои сарҳадӣ табрик намуд

28 май Раиси вилояти Суғд Раҷаббой Аҳмадзода ба қисмҳои ҳарбии мустақар дар ноҳияи Ҷаббор Расулов омада, афсарону сарбозонро ба муносибати 30-солагии таъсисёбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон табрик намуд.

Қайд карда шуд, ки Ҳукумати мамлакат аз оғози таъсиси Қӯшунҳои сарҳадӣ доир ба фароҳам овардани заминаҳои муосири меъёрии ҳуқуқӣ, таҳкими асосҳои моддиву техникӣ, бунёду навсозӣ ва таҷҳизонидани инфрасохтори сарҳадӣ ва омодасозии мутахассисони касбӣ тадбирҳои зиёдеро амалӣ намуд. Дар як муддати кутоҳ барои марзбонон тамоми шароити мусоиди пеш бурдани хизмат, машқу таҳсил, зиндагӣ, истироҳат ва варзиш муҳайё гардид .

Раиси вилоят бо ёдоварӣ аз суханони Пешвои миллат муҳтарам Эмомалӣ Раҳмон таъкид кард, ки солҳои охир бо иқдомоти Ҳукумати мамлакат 120 дидбонгоҳи нав бунёд ва даҳҳо дидбонгоҳи сарҳадии мамлакат таъмиру таҷдид карда шуданд.

Дар мавзӯи “Саноатикунонӣ дар масири рушд” конфронси илмӣ - амалии ҷумҳуриявӣ доир гардид

28 май бахшида ба 30-солагии Ҳизби Халқии Демократии Тоҷикистон бо ташаббуси ҳизб ва дар ҳамкорӣ бо Мақомоти иҷроияи ҳокимияти давлатии вилояти Суғд дар Кохи фарҳанги ба номи Абӯабдуллоҳи Рӯдакии шаҳри Хуҷанд конфронси илмӣ - амалии ҷумҳуриявӣ дар мавзӯи “Саноатикунонӣ дар масири рушд” доир гардид.

Пеш аз оғози конфронс дар саҳни бинои кохи фарҳанг зиёда аз 35 корхонаи саноатии вилоят ва хоҷагиҳои ёрирасони ҲХДТ маҳсулоти хешро ба маърази тамошо гузоштанд. Ба меҳмонон, ки аз дигар манотиқи кишвар ҷиҳати иштирок ба конференсия омада буданд, сифати баланди маҳсулот ва рақобатнокии он дар бозори ҷаҳонӣ хеле писанд афтод.

Таҷлили Рӯзи Қӯшунҳои сарҳадӣ дар қисмҳои низомӣ

Раиси вилояти Суғд Раҷаббой Аҳмадзода дар ноҳияи Ашт афсарону сарбозонро ба муносибати Рўзи Қӯшунҳои сарҳадӣ табрик намуд. 

Зимни суҳбат қайд карда шуд, ки имсол ба таъсисёбии Қӯшунҳои сарҳадии Тоҷикистони соҳибистиқлол, ки аз ҷумлаи рукнҳои муҳимтарини давлатдории мустақили миллии мо мебошад, 30 сол пур мешавад. Қӯшунҳои сарҳадӣ дар тўли таърихи мавҷудияти худ ва дар давраи соҳибистиқлолии давлатамон, аз тамоми санҷишҳои таърихӣ гузашта, дар таъмини ҳифзи марзу буми кишвар, амнияти давлату миллат саҳми арзанда гузоштааст.

Тазаккур дода шуд, ки бо дастгириҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қисмҳои низомӣ барои адои хизмати ҳарбӣ шароити зарурӣ фароҳам оварда шуда, ҷавонони бонангу номус марзҳои давлати соҳибихтиёрамонро бо сари баланд ҳимоя менамоянд.