Аёдати беморону ниёзмандон дар ноҳияи Ашт

Раиси вилояти Суғд Раҷаббой Аҳмадзода ва вазири маориф ва илми мамлакат Раҳим Саидзода зимни сафари корӣ ба ноҳияи Ашт маъюбону камбизоатонро аёдат карданд. 

Раиси вилоят ва вазири маориф ва илм нахуст ба манзили оилаи Эшматовҳо, ки камбизоат мебошад, омадаву ба онҳо кӯмакҳои моддӣ расониданд. 

Сипас, сокини деҳаи Ашти ноҳия Эшонбой Ғиёсиддинов, ки маъюб аст, аёдат карда шуд.

Раҷаббой Аҳмадзода ва Раҳим Саидзода аснои суҳбат қайд карданд, ки тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба оилаҳои ниёзманд ва ятимону маъюбон мунтазам ғамхорӣ карда шуда, ин қишри ҷомеа зери сарпарастии давлат қарор дорад.

Аёдати маъюбон ва камбизоатон дар арафаи Иди саиди Фитр

Раиси вилояти Суғд Раҷаббой Аҳмадзода дар арафаи Иди саиди Фитр ба манзили якчанд нафар камбизоатон ва маъюбони шаҳри Хуҷанд рафта, аз ҳоли онҳо хабар гирифт. 

Раҷаббой Аҳмадзода зимни аёдати сокини маҳаллаи “Қорираҳмат Қурбонов”, маъюби гуруҳи якум Зӯҳро Шукурова, бошандагони маҳаллаи “Масҷиди Савр” собиқадори меҳнат, бонуи 100 сола Саноат Қурбонова, иштирокчии сохти конститутсионӣ Ёқуб Абдураҳмонов, истиқоматкунандагони маҳаллаи “Сирдарё”, шахси яккаву танҳо Раиса Шабаева ва маъюби гуруҳи якум Дилбар Ғаниева таъкид дошт, ки бо дастуру ҳидоятҳои Пешвои муаззами миллат муҳтарам Эмомалӣ Раҳмон роҳбарияти вилоят мунтазам аз ҳоли қишри ниёзманди ҷомеа хабар гирифта, ба онҳо кӯмакҳои моддӣ расонида мешавад. 

1200 нафар даъватшаванда ба хизмати Ватан фиристода шуданд

3 апрели соли 2024 дар Амфитеатри Қасри Арбоб маросими тантанавии гусели​ нахустин гуруҳи даъватшавандагон ба хизмати ҳарбӣ баргузор гардид.

Раиси вилояти Суғд Раҷаббой Аҳмадзода зимни суханронӣ дар ҳузури даъватшавандагон ва волидони онҳо иброз дошт, ки​ ҳимояи Ватан, манфиатҳои давлат, таҳкими Истиқлоли давлатӣ ва иқтидори мудофиавии он вазифаи муқаддаси ҳар як шаҳрванд аст.

Тазаккур дода шуд, ки​ маросими мутантани гусели шаҳрвандони синни даъватӣ ба сафи Қувваҳои Мусаллаҳи Ҷумҳурии Тоҷикистон чун анъана гузаронда шуда, омодагии комили​ ҷавонони бонангу номуси вилояти Суғд ҷиҳати адои хизмати ҳарбӣ нишон медиҳад, ки​ онҳо хизмат кардан барои Модар-Ватанро қарз ва шарафи фарзандӣ медонанд.

Боздид аз аз пойгоҳи обкашии "Янтоқ 3" дар ноҳияи Мастчоҳ

Раиси вилояти Суғд Раҷаббой Аҳмадзода дар ноҳияи Мастчоҳ аз пойгоҳи обкашии "Янтоқ 3" боздид намуд.

Зимни боздид маълумот дода шуд, ки пойгоҳи мазкур дорои 4 агрегат буда, барои фаъолият дар мавсими кишти баҳорӣ омода мебошад. Тавассути ин пойгоҳ зиёда аз 4600 гектар замини ноҳия обёрӣ гардида, он пурра аз таъмир бароварда шудааст. Таъмири саривақтӣ ва фаъолияти муназзами пойгоҳҳои обкашии ноҳия таҳти таваҷҷуҳи доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, соли ҷорӣ аз ҳисоби мақомоти иҷроияи ҳокимияти давлатии вилоят ду муҳаррики барқӣ бо тамоми таҷҳизоташ ва 100 метр қубурҳои қутраш 820 мм ба маблағи умумии зиёда аз 3,3 миллион сомонӣ дастрас гардид. Ин имкон медиҳад, ки фаъолияти босамари пойгоҳҳои обрасонӣ ба роҳ монда шуда, деҳқонон дар вақти мавсим беманоеа ба оби полезӣ дастрасӣ дошта бошанд.

Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир шуд

29 марти соли 2024 дар шаҳри Бодканди вилояти Бодканди Ҷумҳурии Қирғизистон мулоқоти навбатии ҳамраисони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистон ва Қирғизистон — Саймумин Ятимов ва Қамчибек Ташиев баргузор гардид. 

Роҳбарони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон муҳокимаи масъалаи делимитатсияи сарҳади давлатии Тоҷикистон ва Қирғизистонро дар қитъаҳои боқимонда идома дода, баҳри минбаъд муайян намудани хати сарҳад байни ду давлат ба натиҷаҳои назаррас ноил гардиданд.

Инчунин ба гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон ҷиҳати идомаи раванди делимитатсия ва демаркатсияи сарҳади давлатии Тоҷикистон ва Қирғизистон супоришҳои мушаххас дода шуд.