12 январ Раиси вилояти Суғд Раҷаббой Аҳмадзода дар ноҳияи Ҷаббор Расулов бо фаъолияти корхонаи​ коркарди нахи пахта ва ресандагии Ҷамъияти дорои масъулияти маҳдуди “Органик Ян” шинос гардид.

Корхонаи истеҳсолии коркарди нахи пахта ва ресандагии Ҷамъияти дорои масъулияти маҳдуди “Органик Ян” соли 2019 мавриди истифода қарор гирифта,​ дар он нахи пахта коркард ва аз он риштаи пахтагин истеҳсол мегардад. Коркарди нахи пахта дар дохили мамлакат яке аз самтҳои муҳими саноатикунонӣ буда, аз он истеҳсол гардидани маҳсулоти нимтайёру ниҳоӣ иқтидори содиротиро афзун менамояд. Дар асоси дастуру ҳидоятҳои Пешвои миллат муҳтарам Эмомалӣ Раҳмон оид ба васеъ намудани доираи истеҳсолии коргоҳ ва зиёд намудани ҳаҷми истеҳсоли маҳсулоти пахтагин​ бо ташаббуси муассисони корхона соли 2021​ коргоҳи истеҳсоли маҳсулоти патдор ва соли 2022 коргоҳи “Органик-Ян 2” ташкил гардид, ки ба коркарди​ ашёи хоми ватанӣ — пахта ва истеҳсоли​ маҳсулоти хушсифат замина гузошт.​ Барои истеҳсоли маҳсулоти пахтагин таҷҳизоту технологияи муосири ширкатхои пешрафтаи олам ​ васлу насб гардида, садҳо нафар бо ҷойи корӣ таъмин шудаанд.

12 январ Раиси вилояти Суғд Раҷаббой Аҳмадзода дар ноҳияи Ҷаббор Расулов аз ҳавзҳои моҳипарварии Ҷамъияти дорои масъулияти маҳдуди “Корпоратсияи моҳии тоҷик”  боздид намуд.

Ҳавзҳои моҳипарварии Ҷамъияти дорои масъулияти маҳдуди “Корпоратсияи моҳии тоҷик” соли 2021 бунёд гардида, масоҳати умумии онҳо 3,2 гектарро ташкил мекунад ва шумораи ҳавзҳо 21 адад мебошад. Дар ин ҷо асосан гулмоҳӣ парвариш карда шуда, маҳсулот ба бозорҳои маҳаллӣ ба фурӯш бароварда мешаванд.