26 феврали соли равон дар ​ назди Театри мазҳакаи мусиқии ба номи Камоли Хуҷандӣ ярмарка-фурӯши ниҳол, кӯчату тухмии гулу зироатҳо баргузор гардид.

Раиси вилояти Суғд Раҷаббой Аҳмадзода зимни иштирок дар ярмаркаи мазкур таъкид кард, ки ярмарка-фурӯши ниҳол, кӯчату тухмии гулу зироатҳо дар асоси амри Раиси вилоят гузаронида шуда, ҳадафи аз ташкили он муташаккилона гузаронидани маъракаи кабудизоркуниву ободонӣ ва расонидани ёрии амалӣ ба хоҷагиҳои кишоварзӣ ва аҳолии вилоят мебошад.

Гуфта шуд, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳама суханронӣ ва паёмҳои худ оид ба кабудизоркунӣ, ободонӣ ва бунёди боғу токзорҳои нав, азнавбарқароркунӣ ва сохтмони гармхонаҳо барои парвариши сабзавоти барвақтӣ супоришу дастурҳо дода, ба рушди соҳа эътибори хоса зоҳир менамоянд.

Дар натиҷаи қабул ва амалигардонии Барномаҳои давлатӣ рушди соҳаи боғу токпарварӣ таъмин гардида, ҳамасола садҳо гектар боғу токзори нав бунёд мегардад. Аз ҷумла, соли сипаригашта дар шаҳру ноҳияҳои вилоят 799,8 гектар боғу токзорҳои нав бунёд карда шуда, нақшаи пешбинигардида барзиёд таъмин гардид.

Раҷаббой Аҳмадзода инчунин илова намуд, ки барои рушди боғу токпарварӣ, зиёд намудани ҳаҷми истеҳсоли маҳсулоти рақобатпазири тамоюли содиротидошта, танзими бозорҳои истеъмолӣ ва таъмини аҳолӣ бо меваҳои худӣ бояд аз тамоми имкониятҳо истифода бурда шавад.

Дар ярмарка-фурӯши ниҳол, кӯчату тухмии гулу зироатҳо, ки ҳамасола баъд аз таҷлили Иди Сада гузаронида мешавад, аз ҷониби ниҳолпарварони шаҳру ноҳияҳо, хоҷагии ҷангал, раёсати ҳифзи муҳити зист ва дигар идораҳо беш аз 1 миллион ниҳолҳои гуногун, гулу зироатҳо пешниҳоди аҳолӣ гардид.

Ҳамзамон аз ҷониби Филиали Суғдии институти боғпарварӣ нуқтаи маслиҳатдиҳӣ таъсис дода шуда, доир ба омода намудани замин, ​ тарзи шинонидани ниҳолҳо, башаклдарории боғу токзор тавсияҳо дода шуд.

Ярмарка-фурӯши ниҳол, кӯчату тухмии гулу зироатҳо 27 феврал низ идома меёбад.

Хадамоти матбуоти
Раиси вилояти Суғд

22 феврали соли 2022 дар Кохи фарҳанги ба номи Абӯабдуллоҳи Рӯдакии маркази вилоят ба муносибати Рўзи Қувваҳои Мусаллаҳи Ҷумҳурии Тоҷикистон ҷамъомади тантанавӣ баргузор гардид.

Раиси вилояти Суғд Раҷаббой Аҳмадзода зимни иштирок ва суханронӣ дар ҷамъомад аз номи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон собиқадорон, хизматчиёни ҳарбии Қувваҳои Мусаллаҳ ва мақомоти ҳифзи ҳуқуқи вилоятро, ки дар бунёди ҷомеаи демократӣ, ҳуқуқбунёду дунявӣ, ҳифзи марзу буми Ватан, таъмини амнияти давлат ва осоиши ҷомеа саҳми назаррас мегузоранд, табрику таҳният намуд.

Таъкид карда шуд, ки Қувваҳои Мусаллаҳи Ҷумҳурии Тоҷикистон дар замоне таъсис ёфт, ки кишварро ҷангу хунрезӣ, беқонуниву беҳокимиятӣ, буҳрони шадиди иқтисодӣ, вазъи ноороми сиёсӣ фаро гирифта, набудани одитарин техникаву таҷҳизоти ҳарбӣ, силоҳу муҳимоти ҷангӣ ва кадрҳои соҳибихтисос сари ҳар қадам эҳсос мешуд. Ин ниҳоди кудратманди кишвар аз он рўзҳои вазнин сар карда, дар барқарор кардани сохти конститутсионӣ ва ҳокимияти қонунӣ, мубориза бар зидди дастаҳои мусаллаҳи ҷинояткор, ошўбҳои хиёнаткорона, кўшишҳои табаддулоти ҳарбии хоинони миллат ва ҳифзи сарҳади давлатӣ хизмати фидокоронаро анҷом дода, аз имтиҳони ҷиддии ҳаёт гузашт.

-Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле бамаврид таъкид намудаанд, ки «ҳайати шахсии Қувваҳои Мусаллаҳ дар солҳои душвори муқовимати мусаллаҳонаи дохилӣ ва ҷанги таҳмилии шаҳрвандӣ қарзи фарзандии худро дар назди Ватан ва халқи Тоҷикистон содиқона иҷро карда, дар роҳи ба эътидол овардани вазъият, яъне қатъи ҷангу хунрезӣ, таъмини сулҳу субот ва мубориза бар зидди гурўҳҳои экстремистиву террористӣ саҳми басо арзишманд гузоштанд».

Воқеан ҳам, Қувваҳои Мусаллаҳ бо вуҷуди мушкилоти зиёде, ки дар тўли солҳои аввали истиқлол дар ҳаёти иқтисодиву иҷтимоии кишвар ҷой доштанд, тадриҷан ба як нерўи тавонои ҳарбӣ табдил ёфтанд,- иброз дошт Раҷаббой Аҳмадзода.

Раиси вилоят ҳамзамон илова намуд, ки бо мақсади таъмини иҷрои супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон ба такмили фаъолияти қисмҳои низомӣ, беҳтар гардонидани шароити зиндагӣ, интизоми ҳайати шахсӣ ва омодагии ҷангии онҳо таваҷҷўҳи хоса зоҳир карда мешавад.

Дар заминаи дастуру супоришҳои Пешвои муаззами миллат муҳтарам Эмомалӣ Раҳмон мақомоти иҷроияи ҳокимияти давлатии вилоят ҷиҳати беҳтар намудани базаи моддӣ-техникии қисмҳои ҳарбии ҳудуди вилоят ғамхории доимӣ зоҳир намуда, баҳри беҳтар намудани шароити хизмат чораҳои заруриро андешида истодааст.

Бахусус, соли 2021 дар шароити зудтағйирёбанда роҳбарияти вилоят ба ҳамаи қисмҳои ҳарбии гарнизони Суғд сафарҳои корӣ анҷом дода, ба тамоми қисмҳои ҳарбӣ кўмакҳои моддиву молиявӣ расонида, бори дигар исбот намуд, ки беҳдошти хизмат ва баланд бардоштани иқтидори мудофиавии кишвар мақсади асосии давлату Ҳукумат ба шумор меравад.

Ҳамаи ҷузъу томҳои дар вилояти Суғд будаи Қувваҳои Мусаллаҳи Ҷумҳурии Тоҷикистон бо базаи моддию техникӣ таъмин гардида, барои фароҳам овардани шароити муносиби зиндагию фаъолияти ҳайати шахсии онҳо корҳои назаррас анҷом дода мешаванд.

Изҳори боварӣ карда шуд, ки афсарону сарбозони далеру шуҷои Қувваҳои Мусаллаҳ ба савганди ҳарбии худ ҳамеша содиқ монда, рисолати фарзандии худро дар назди Ватан, миллат ва давлати худ минбаъд низ содиқона адо мекунанд ва тамоми донишу таҷриба, малакаву маҳорати худро ба хотири ҳифзи давлатдории навини миллати тоҷик сафарбар сохта,  30-солагии Иҷлосияи 16–уми  Шўрои  Олии Ҷумҳурии  Тоҷикистон – рўйдоди сарнавиштсози миллиамонро бо хизмати содиқона, интизоми намунавӣ ва омодабошии баланд истиқбол мегиранд.

Сипас, барномаи рангини консертии аҳли фарҳанг пешниҳод гардида, ба як қатор хизматчиёни ҳарбӣ барои хизмати содиқона, саҳми арзанда дар иҷрои вазифаҳои хизматӣ, ноил шудан ба натиҷаҳои назаррас ва ба муносибати 29-солагии таъсисёбии Қувваҳои Мусаллаҳи Ҷумҳурии Тоҷикистон Сипосномаи мақомоти иҷроияи ҳокимияти давлатии вилоят ва туҳфаҳои хотиравӣ супорида шуд.

Хадамоти матбуоти
Раиси вилояти Суғд