Дар ноҳияи Ашт корҳои соҳилмустаҳкамкунӣ идома дошта, барои иҷрои корҳо гуруҳҳои кории мақомоти иҷроияи ҳокимияти давлатии ноҳия сафарбар карда шудаанд.

Зимни шиносоии Раиси вилояти Суғд Раҷаббой Аҳмадзода бо рафти корҳои соҳилбандӣ иттилоъ дода шуд, ки​ сохтмончиёни соҳибтаҷрибаи маҳаллӣ ба кор ҷалб гардида, сокинон низ дар ин иқдом саҳми арзандаи худро мегузоранд.​ Таваҷҷуҳи асосӣ​ ба мустаҳкам кардани соҳили сою наҳрҳо равона гардидааст, то ҳангоми омадани сел одамон ва амволашон зарар набинанд.

Иттилоъ дода шуд, ки баҳри пешгирии офатҳои табиӣ аз ҷониби мақомоти иҷроияи ҳокимияти давлатии ноҳия ва сокинони саховатпеша тамоми тадбирҳо андешида шуда, корҳои соҳилбандӣ дар ҳудудҳои осебпазири ноҳия, аз ҷумла ҷамоатҳои деҳоти Понғоз, Ошоба, Пунук ва Ашт идома доранд.

Раиси вилояти Суғд Раҷаббой Аҳмадзода аснои сафари корӣ ба ноҳияи Ашт дар деҳоти Ошобаи ноҳия дар маъракаи кишти пахта иштирок кард.

Тавре маълумот дода шуд,​ Ҷамоати деҳоти Ошоба аз калонтарин ҷамоатҳои пахтакори ноҳия ба ҳисоб рафта, заркорони ноҳия тасмим доранд, ки соли равон дар 2510 гектар пахта кишт намуда, саҳми худро дар ғанисозии хирмани ноҳия ва вилоят гузоранд. Дар ноҳияи Ашт соли равон 6200 гектар пахта кишту парвариш карда шуда, имрӯзҳо бо истифода аз рӯзҳои офтобӣ деҳқонон ба корҳои саҳроӣ машғул ҳастанд.

Раиси вилоят якҷо бо пирони рӯзгор ба кишти пахта оғоз бахшида, аз кишоварзон даъват намуд, ки ҳар порча заминро пурсамар истифода намуда, саҳми худро дар таъмини амнияти озуқавории мамлакат гузоранд.

5 апрел Раиси вилояти Суғд Раҷаббой Аҳмадзода дар ноҳияи Ашт аз пойгоҳи обкашии «АНС-2»-и Идораи давлатии беҳдошти замин ва обёрии ноҳия боздид намуд.

Тибқи иттилоъи масъулин соли ҷорӣ барои таъмиру таҷдиди иншооти обрасонии ноҳияи Ашт аз тарафи мақомоти иҷроияи ҳокимияти давлатии вилоят 700 ҳазор сомонӣ ва аз мақомоти иҷроияи ҳокимияти давлатии ноҳия 300 ҳазор сомонӣ ҷудо гардида, ҳамаи пойгоҳҳои обкашии ноҳия аз​ соли гузашта 15 рӯз пештар ба фаъолият омода гардид.

Дар ноҳияи Ашт заминҳои кишоварзӣ асосан тавассути пойгоҳҳои обкашӣ обёрӣ шуда, бо ин мақсад ҳамасола аз ҷониби давлат маблағҳои зарурӣ ҷудо мегардад.

Дар доираи корҳои ободониву созандагӣ ба истиқболи​ 35-солагии Истиқлоли давлатии Ҷумҳурии Тоҷикистон дар ноҳияи Ашти​ вилояти Суғд бунёди як қатор иншооти гуногун ҷараён дорад.

5 апрел Раиси вилояти Суғд Раҷаббой Аҳмадзода ба ноҳия сафар намуда, бо рафти бунёдкориҳо дар ноҳия шинос гардид. Тавре иттилоъ дода шуд, дар асоси дастуру ҳидоятҳои​ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва расидан ба ҳадафи чоруми миллӣ-саноатикунонии босуръат дар ноҳия имрӯзҳо сохтмони корхонаҳои нави​ саноатӣ идома дорад. Яке аз чунин корхонаҳо корхонаи ҷӯроббофӣ буда, дар Ҷамоати деҳоти Шодоба қарор дорад.​ Корхонаи мазкур аз тарафи ассотсиатсияи ҶДММ “Саноати Ашт” бо иқтидори истеҳсоли то 30 ҳазор ҷуфт ҷӯроб ба истифода дода шуда, дастгоҳҳои зарурӣ васлу насб гардидааст. Арзиши лоиҳавии корхона беш аз 900 ҳазор доллари ИМА буда, баробари мавриди баҳрабрадорӣ қарор гирифтани он то 150 нафар сокинони маҳаллӣ бо кори доимӣ таъмин мегарданд.​ Айни замон корхона ба таври таҷрибавӣ фаъол гардида, аз ҷониби мутахассисон ба коргарон тарзу усулҳои кор бо таҷҳизор омӯзонида шуда истодааст.​ Бинои корхона аз сехҳои истеҳсолӣ, ҳуҷраҳои дӯзандагӣ, дарзмолкунӣ, борпеч ва басту банд, анбор, ошхона, ҳамом ва дигар утоқҳои ёрирасон иборат мебошад.​