Зимни сафари корӣ ба шаҳри Истаравшан рӯзи 3 январ Раиси вилояти Суғд Раҷаббой Аҳмадзода бо фаъолияти коргоҳи дуредгарии "Усто Солеҳ" шинос шуд.

Коргоҳи дуредгарии "Усто Солеҳ" аз соли 2011 фаъолият менамояд ва ба Солеҳ Азизов мансуб мебошад. 

Дар он беш аз 15 нафар кормандон, аз ҷумла занон ба кори доимӣ машғул шуда, дар сурати бисёр шудани фармоиш теъдоди кормандон зиёд карда мешавад. 

Кормандон асосан бо тоза кардану буридани чӯб, рангпошӣ, наққошиву кандакорӣ ва дигар корҳо машғул шуда, қисман кори коргоҳ тариқи технологияи муосир идора карда мешавад. 

Дар коргоҳи мазкур беш аз 20 намуд маҳсулот, аз ҷумла сутунпояҳо, мебел, наққошиҳо барои чилчароғ, айвонҳо (бисетка), кат, дар, мизу курсиҳо ва ғайра аз намуди чӯбҳои гуногун, ки аз давлатҳои Россия, Туркия ва Италия дастрас мешаванд, истеҳсол мегардад.

3 январ Раиси вилояти Суғд Раҷаббой Аҳмадзода дар шаҳри Истаравшан бо фаъолияти хоҷагиҳои ниҳолпарварӣ шинос гардид.

Тавре иттилоъ дода шуд, дар ҳудуди Ҷамоати деҳоти Сабристони шаҳри Истаравшан 1540 хоҷагии деҳқонӣ фаъолият дошта, дар пешрафти соҳаи кишоварзии шаҳр саҳми босазо гузошта истодаанд. 

Айни ҳол дар хоҷагиҳои деҳқонии ҷамоат зиёда аз 1 миллион бех ниҳоли мевадиҳанда, ороишӣ ва сояафкан парваришу нигоҳубин карда мешаванд.  

Дар хоҷагии деҳқонии «Анўшервон», ки яке аз калонтарин хоҷагиҳо дар ҷамоат ба ҳисоб меравад, зиёда аз 400 ҳазор бех ниҳоли мевадиҳанда парвариш карда мешавад. 

Хоҷагии мазкур на танҳо хоҷагиҳои шаҳри Истаравшан, балки хоҷагиҳои вилояту ҷумҳуриро низ бо ниҳоли аълосифат таъмин менамояд. 

Бо дастгирии мақомоти иҷроияи ҳокимияти давлатии шаҳри Истаравшан Варзишгоҳи марказии шаҳри Истаравшан чароғон карда мешавад.

Зимни боздиди Раиси вилояти Суғд Раҷаббой Аҳмадзода аз шаҳри Истаравшан иттилоъ дода шуд, ки варзишгоҳ бо дастгирии Пешвои миллат муҳтарам Эмомалӣ Раҳмон баъд аз таъмиру таҷдид соли 2014 ба истифода дода шуда буд. Варзишгоҳ барои 18 ҳазор ҷойи нишаст бунёд шуда, имрўз ба макони баргузории чорабиниҳои сиёсию фарҳангӣ ва варзишӣ табдил ёфтааст.

Бояд зикр кард, ки соли равон дастаи футболи «Истаравшан» дар Лигаи олӣ баромад менамояд ва бозиҳои даста маҳз дар ҳамин варзишгоҳ доир мегардад.

Бо мақсади иҷрои супоришҳои Президенти Федератсияи футболи Тоҷикистон муҳтарам Рустами Эмомалӣ ва ба талаботи муосир ҷавобгў намудани варзишгоҳ дар майдони он сабзаи табиӣ истифода хоҳад шуд. 

Дар доираи корҳои ободонию созандагӣ ба истиқболи 35-солагии Истиқлоли давлатии Ҷумҳурии Тоҷикистон дар шаҳри Истаравшан азнавсозии Боғи фарҳангию фароғатии «Ҷавонон» идома дорад.

Боғи фарҳангию фароғатии «Ҷавонон» дар маркази шаҳр ҷойгир буда, бинобар маблағгузорӣ нагардидан солҳои зиёд аз таваҷҷуҳ берун монда буд ва тамоми таҷҳизоти фароғатии он, ки истеҳсоли замони шӯравӣ мебошанд, аз кор монда буд. Боғи мазкур, ки дар кумитаи маҳаллаи ба номи Дилшоди Барнои шаҳри Истаравшан аст, пурра азнавсозӣ хоҳад шуд.

Фармоишгари корҳои азнавсозию барқароркунӣ ҶДММ “Комрон-обод” мебошад.

Масоҳати боғ 2,3 гектар буда, маблағи лоиҳавии корҳои азнавсозӣ 3 млн. сомониро ташкил медиҳад.