Дар шаҳри Бӯстон меҳмонхонаи "Хуҷанд" навсозӣ мешавад

Дар доираи омодагиҳо ба ҷашни 35-солагии Истиқлоли давлатии Ҷумҳурии Тоҷикистон дар шаҳри Бӯстон корҳои ободониву созандагӣ вусъат меёбад.

Дар ин раванд бо дастгирии мақомоти иҷроияи ҳокимияти давлатии вилоят ва шаҳри Бӯстон меҳмонхонаи "Хуҷанд" азнавсозӣ гардида, кӯле, ки дар шафати он қарор дорад, ба таъмир фаро гирифта хоҳад шуд.

Тавре зимни муаррифии лоиҳаи азнавсозии иншоот ба Раиси вилояти Суғд Раҷаббой Аҳмадзода иттилоъ дода шуд, кӯли шаҳри Бӯстон ба минтақаи истироҳативу фароғатӣ табдил дода шуда, шӯҳрати пешинаи он барқарор карда мешавад. 

Чемпионати Ҷумҳурии Тоҷикистон оид ба ҷудо байни ҷавонон оғоз ёфт

Имрӯз дар шаҳри Хуҷанд маросими ифтитоҳи чемпионати Ҷумҳурии Тоҷикистон оид ба ҷудо байни ҷавонони солҳои таваллуди 2004-2006 баргузор гардид.

Дар маросими кушодашавии мусобиқаи мазкур Раиси вилояти Суғд Раҷаббой Аҳмадзода, Президенти Федератсияи ҷудои Тоҷикистон Исмоил Маҳмадзоир, варзишгарону ҷавонон иштирок намуданд.

Раиси вилоят Раҷаббой Аҳмадзода зимни суханронӣ иброз дошт, ки дар Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои инкишофи ҳамаҷонибаи тарбияи ҷисмонӣ ва варзиш дар байни оммаи васеи халқ ва варзишгарони касбию дӯстдорони ин соҳа мусобиқаҳои варзишӣ ташкил ва гузаронида мешаванд.

Боздиди Раиси вилоят аз ярмарка-фурӯши маҳсулоти кишоварзӣ

Бо ибтикори Мақомоти иҷроияи ҳокимияти давлатии вилояти Суғд имрӯз дар маркази вилоят ярмарка-фурӯши маҳсулоти кишоварзӣ ташкил карда шуд.

Раиси вилояти Суғд Раҷаббой Аҳмадзода аз ярмаркаи мазкур боздид карда, бо нархи маҳсулот аз наздик шинос гардид. 

Дар ярмарка-фурӯши маҳсулоти кишоварзӣ кишоварзон ва корхонаҳои саноатӣ маводи ғизоии нисбатан арзонро пешниҳоди сокинон намуданд.

Мулоқоти Раиси вилоят Раҷаббой Аҳмадзода бо роҳбарият ва фаъолони шаҳри Панҷакент

6 июн дар толори Мақомоти иҷроияи ҳокимияти давлатии шаҳри Панҷакент мулоқоти Раиси вилояти Суғд Раҷаббой Аҳмадзода бо фаъолони шаҳр баргузор гардид.

Раиси вилоят мулоқотро ифтитоҳ намуда, қайд намуд, ки дар шаҳру ноҳияҳои вилояти Суғд барои иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз Паём ба Маҷлиси Олӣ ва дигар мулоқоту вохӯриҳо бармеояд, тадбирҳои зарурӣ амалӣ гардида истодааст. Дар шаҳри Панҷакент низ ҷиҳати расидан ба ҳадафҳои гузошташуда ва барои боз ҳам беҳтар намудани сатҳи зиндагии мардум чораҷӯӣ шуда, имкониятҳо истифода бурда мешавад.

Сипас, доир ба фаъолияти Мақомоти иҷроияи ҳокимияти давлатии шаҳри Панҷакент дар панҷ моҳи соли равон раиси шаҳр Абдухолиқ Холиқзода гузориш дод. Мавсуф таъкид намуд, ки дар шаҳри Панҷакент дар асоси дастуру супоришҳои Пешвои миллат муҳтарам Эмомалӣ Раҳмон ва роҳбарияти вилоят ҷиҳати рушди соҳаҳои хоҷагии халқ чораҷӯӣ карда шуда, барои иҷрои саривақтии супоришҳо ва барномаҳои давлатӣ тадбирҳо амалӣ мегардад.

Шиносоӣ бо вазъи соҳаи кишоварзӣ дар Панҷакент

Раиси вилояти Суғд Раҷаббой Аҳмадзода дар деҳоти шаҳри Панҷакент бо рафти корҳои саҳроӣ, аз ҷумла кишти картошка шинос гардид.

Кишоварзони деҳоти Панҷакент тибқи нақша соли равон дар 3900 гектар замин кишти картошкаро ба роҳ мемонанд ва то имрӯз 2525 гектар картошка кишт шудааст. Барои дар сатҳи зарурӣ гузаронидани корҳо аз дигар минтақаҳо 4000 тонна тухмии картошка ворид карда шуда, бо истифода аз имкониятҳо масъулин ва деҳқонон ният доранд, ки истеҳсоли картошкаро то 100 ҳазор тонна расонанд.

Раиси вилоят ба роҳбарияти шаҳр, масъулини соҳаи кишоварзӣ ва кумитаи замин дастур дод, ки нақшаи кишти картошка ҳарчи зудтар иҷро карда шавад.

Дар идомаи боздид роҳбари вилоят сохтмони гармхонаи замонавиро мавриди таваҷҷуҳ қарор дод. Гармхона дар масоҳати 1 гектар сохта шуда, дар парвариши сабазавот таҷҳизот ва таҷрибаи Кореяи ҷанубӣ истифода бурда хоҳад шуд.