31 май Раиси вилояти Суғд Раҷаббой Аҳмадзода дар шаҳри Бӯстон бо ҷараёни корҳои ободониву созандагӣ ва сохтмони иншооти ҷашнӣ шинос гардид.

Рушди соҳаи саноат, зиёд намудани иқтидори истеҳсолӣ, ворид намудани технологияи нави истеҳсолӣ ва дар ин замина ташкили ҷойҳои нави корӣ аз ҳадафҳои созандаи давлату Ҳукумат ба ҳисоб рафта, дар вилояти Суғд сол аз сол шумораи корхонаҳои саноатӣ зиёд мегардад. Бо мақсади дар амал татбиқ намудани дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дар доираи корҳои ободониву созандагӣ бахшида ба ҷашни 35-солагии Истиқлоли давлатӣ дар минтақаи саноатии шаҳри Бӯстон аз ҷониби соҳибкорон корхонаи нави саноатӣ бунёд гардида, дар он истеҳсоли 16 намуд қубурҳои полиэтиленӣ ба роҳ монда мешавад. Зимни шиносоӣ бо раванди корҳои созандагӣ ба Раиси вилоят маълумот доданд, ки корхонаи нав дар масоҳати 3 ҳазор метри мураббаъ таъсис ёфта, дар як сол то 60 ҳазор метр қубурҳои полиэтилении гуногунҳаҷм истеҳсол карда мешавад. Бо мавриди истифода қарор гирифтани корхонаи ҶДММ «Мироб Тҷ» беш аз 20 нафар сокинон бо ҷойи кор ва маоши хуб таъмин мешаванд.

Дар Мактаби Президентӣ барои хонандагони болаёқат бо мақсади тарғибу ташвиқи либоси миллӣ, тарбияи зебоипарастӣ, эҳё ва ҳифзу нигоҳдошти беҳтарин суннатҳои мардумии ниёгон дар самти тарроҳии либоси анъанавии тоҷикона, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ, рушди атласу адрасбофӣ, ҷиҳати таъмини иҷрои Амри Президенти Ҷумҳурии Тоҷикистон аз 3 январи соли 2023, №АП-318 ҷадвали баргузории фестивал, намоиш, ид, озмунҳои анъана ва ҳунарҳои мардумӣ ва ҷашну солгардҳо дар сатҳи ҷумҳурӣ барои соли 2023 ва қарори Раиси вилояти Суғд аз 02 майи соли 2023, №144 «Дар бораи ташкил ва баргузории Фестивали вилоятии «Атласу адрас», ҳамчунин тибқи нақша-чорабиниҳои мақомоти иҷроияи ҳокимияти давлатии шаҳри Бӯстон даври шаҳрии Фестивали атласу адрас ва намоишу фурӯши онҳо баргузор карда шуд.

Нахуст муовини раиси шаҳр Мамнур Нурзода суханронӣ намуда, зикр дошт, ки атласу адрасбофӣ аз ҳунарҳои маъмулии тоҷикон маҳсуб ёфта, то ба имрўз маъруфияти зиёд дорад. Ин матоъҳо, ки хусусияти миллӣ ва фарҳангии мо-тоҷиконро таҷассумгар аст, дар муди ҷаҳонӣ, дар арсаи олам васеъ истифода мегардад.