Мардуми заҳматпешаю бунёдкори вилояти Суғд дар пайравӣ ба иқдому ташаббусҳои созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон садҳо километр роҳҳои ҳудуди шаҳру ноҳияҳоро мутобиқ ба меъёру талаботи пешбинишуда ва бо истифода аз техникаю механизми зарурӣ пурра мумфарш намуда, бо мақсади сазовор истиқбол гирифтани ҷаншни бузурги миллӣ – 35 - солагии Истиқлоли давлатии Ҷумҳурии Тоҷикистон тадбирҳои ободониро дар муттаҳидию сарҷамъӣ бо сатҳу сифати баланд амалӣ менамоянд.

Имсол дар баробари иҷрои дигар тадбирҳои муҳими созандагӣ раванди мумфарш намудани роҳҳои мошингард дар 18 шаҳру ноҳияи вилоят вусъат ёфт ва нишондоди корҳои иҷрошуда қобили сотоиш ва намунаи ибрат аст. 

Ҷамоати деҳоти Ғазантарак, ки дар ноҳияи Деваштич ҷойгир аст ва беш аз 23 ҳазор нафар аҳолӣ дорад, дастгириҳои Пешвои миллат муҳтарам Эмомалӣ Раҳмон ва талошҳои пайвастаи сокинони заҳматдӯст ба яке аз гӯшаҳои ободу хуррам табдил ёфтааст. Маҳз самараи Истиқлоли давлатии Ҷумҳурии Тоҷикистон мебошад, ки бо таваҷҷуҳи давлат ва меҳнати аҳлонаи мардум ҷамоат симои худро тағйир додааст ва бунёдкориҳо дар авҷ аст. 

Мардуми ҷамоат аз рӯзҳои аввали соҳибистиқлолӣ то имрӯз бо меҳнатдӯстӣ, худшиносӣ ва ҳисси баланди ватандӯстӣ ба корҳои созандагиву ободкорӣ рӯ овардаанд. Кишоварзӣ ва чорводорӣ аз шуғлҳои асосии сокинон маҳсуб ёфта, дар заминаи барномаҳои рушди деҳот ва дастгирии давлат рушди соҳаҳо таъмин гардида истодааст, ки болоравии сатҳи зиндагӣ гувоҳи ин гуфтаҳост.