Бо қарори Раиси вилояти Суғд​ Барномаи маҳаллии рушди футбол дар вилояти Суғд барои солҳои 2022-2026 тасдиқ гардид.

Барномаи маҳаллии рушди футбол дар вилояти Суғд барои солҳои 2022-2026 ҷиҳати рушди футбол ва фароҳам овардани шароити варзишӣ тасдиқ гардида, идомаи мантиқии​ Барномаи маҳаллии рушди футбол дар вилояти Суғд барои солҳои 2017-2021 маҳсуб меёбад. Барномаи мазкур дурнамо барои панҷ соли оянда ба ҳисоб рафта, он самтҳои асосии фаъолият, афзалиятҳо, вазифаҳо ва тартиби амалинамоии сиёсати давлатӣ дар соҳа ва роҳҳои амалисозии чорабиниҳои рушди футболро муайян менамояд.

8 март дар қаламрави вилояти Суғд Рӯзи Модар таҷлил карда мешавад. Дар ин бора қарори дахлдори Раиси вилояти Суғд Раҷаббой Аҳмадзода ба имзо расид.

Дар доираи таҷлили Рӯзи Модар доир намудани мулоқоту вохӯрӣ, конфронсу суҳбатҳо дар муассисаҳои таҳсилоти олӣ, миёнаи касбӣ, омӯзишгоҳҳо ва муассисаҳои таҳсилоти миёнаи умумӣ, конфронси вилоятии «Дастовардҳои занон дар даврони соҳибистиқлолии давлати Тоҷикистон», ташкили мусобиқаҳои варзишии волейбол, баскетбол, теннизи рӯи миз, шашкаю шоҳмот байни бонувон дар ташкилоту идораҳо ва донишгоҳҳо, аёдати занони фаъол ва собиқадорони меҳнат дар назар дошта шудааст.