Мақомоти иҷроияи ҳокимияти
давлатии вилояти Суғд
Ҷашни Сада рӯзи арҷгузорӣ ва иззату эҳтиром ниҳодан ба нуру гармӣ, рӯ овардан ба равшанӣ, рамзи меҳру муҳаббат ва дӯстиву рафоқат мебошад, ки аз ҷониби мардуми шарафманди тоҷик ҳамасола бо риояи тамоми суннату анъанаҳои хос таҷлил мегардад.
Ба хотири арҷгузорӣ ба ҷашнҳои милливу куҳан 26 январи соли 2023 дар саҳни Коллеҷи ҳунарҳои мардумии шаҳри Истаравшан, ки макони асосии тантанаҳои ҷашнӣ ба ифтихори таҷлили ин иди бостонӣ интихоб шуда буд, ҷашни Сада бо шукӯҳу шаҳомати хоса таҷлил карда шуд.
28-уми январи соли 2023 дар майдони назди театри Камоли Хуҷандии шаҳри Хуҷанд Иди Сада таҷлил карда мешавад.
Дар доираи таҷлили Иди Сада ярмаркаи маҳсулоти кишоварзӣ, намоиш-фурӯши тухмии зироатҳои кишоварзӣ ва намоиши маҳсули дастии ҳунармандони вилоят гузаронида мешавад.
Дар шаҳри Исфара ҷашни аҷдодӣ - иди Сада бо шукӯҳу шаҳомати хосса таҷлил гардид.
Дар боғи ба номи Сайфи Исфарангии маркази шаҳр намоиши олоти кории деҳқонӣ ва техникаи кишоварзӣ, ниҳолу гулбуттаҳо, сабзавоту меваҳои шаҳдрез ва тухмии зироатҳо ташкил гардид, ки ифодагари омодагии марди деҳқон ба фасли баҳор буд.
Маҳсули ҳунарҳои мардумии ба намоиш гузошташудаи намояндагони ҷамоатҳои шаҳраку деҳот, корхонаву ташкилот ва муассисаҳои таълимӣ аз завқи баланд, маҳорати беназир ва таърихи бойи косибиву ҳунармандӣ дар Исфара дарак медод.
