Мақомоти иҷроияи ҳокимияти
давлатии вилояти Суғд
Байни Донишгоҳи давлатии Хуҷанд ба номи академик Бобоҷон Ғафуров ва Донишкадаи забонҳои хориҷии Самарқанд созишномаи ҳамкорӣ ба имзо расид.
Дар ин бора аз донишгоҳи мазкур хабар дода, афзуданд, ки ҷонибҳо дар асоси созишномаи ҳамкорӣ рушди робитаҳои илмӣ-инноватсионӣ, фарҳангӣ, инчунин таъмини табодули таҷрибаро миёни кормандону донишҷӯён ба роҳ монда, дар самти ташкили чорабиниҳои муштарак иқдом менамоянд.
Бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон баргирифта аз Паёми навбатиашон ҷиҳати ҷилавгирӣ аз воридоти молу маҳсулоти пастсифат ва ғайристандартӣ, ҳимояи ҳуқуқи истеъмолкунандагон ва пешгирии бемориҳои сироятӣ дар Маркази назорати давлатии санитарию эпидемиологии вилояти Суғд бо роҳбарони бозорҳо ва марказҳои бузурги савдо мулоқот баргузор гардид.
Директори Маркази назорати давлатии санитарию эпидемиологии вилояти Суғд Таҳмина Усмонова оид ба қарорҳои сардори Хадамоти назорати давлатии санитарию эпидемологии Ҷумҳурии Тоҷикистон ва сардухтури Маркази назорати давлатии санитарию эпидемиологии вилоят «Дар бораи манъ намудани фурӯши маҳсулоти хӯроквории тезвайроншаванда, хӯришҳои консервашудаи дар шароити хона тайёршуда, истеҳсол ва фурӯши яхмос ва нӯшокиҳои ташнагишикан дар ҷойҳои ғайримуқаррарӣ», ки бо мақсади пешгирӣ намудани ҳодисаҳои заҳролудшавӣ аз маҳсулоти хӯроквории зикршуда ба тасвиб расидаанд, иттилоъ дод.
Дар шаҳри Бӯстон нақшаи даъвати ҷавонон ба хизмати ҳарбӣ пурра иҷро гардид. Дар ин бора аз мақомоти иҷроияи ҳокимияти давлатии шаҳр хабар доданд.
Дар доираи нақшаи чорабиниҳои мақомоти иҷроияи ҳокимияти давлатии шаҳри Бӯстон роҳандозӣ намудани корҳои тарғиботиву ташвиқотӣ, анҷом додани мулоқоту вохӯриҳо бо насли ҷавон ва волидайни онҳо, экскурсияи ҷавонони синни даъватӣ ба қисмҳои ҳарбии ҳудуди шаҳр, боздиди волидайн аз қисмҳои ҳарбӣ, баргузории чорабиниву мусобиқаҳои ҳарбӣ-ватанпарастии дорои хусусиятҳои тарбиявию маърифатӣ имкон дод, ки яке аз аввалинҳо шуда, нақшаи босифати даъвати навбатии шаҳрвандони солҳои таваллуди 1995-2004 ба хизмати ҳарбиро ба пуррагӣ иҷро намояд.
