Тавре қаблан хабар дода будем, ҷиҳати иштирок дар чорабинии ҷумҳуриявӣ ба ифтихори 30-солагии Иҷлосияи ХVI Шўрои Олии Ҷумҳурии Тоҷикистон аз пойтахти мамлакат шаҳри Душанбе гуруҳи калони меҳмонон ба вилояти Суғд ташриф оварда буд.

Дар гуруҳ вакилони Иҷлосияи ХVI Шўрои Олии Ҷумҳурии Тоҷикистон, собиқадорони меҳнат, аҳли зиё, шоирону адибон, кормандони ташкилоту идораҳои ҷумҳуриявӣ шомил буда, меҳмонон пас аз иштирок дар конференсияи ҷумҳуриявии «Иҷлосияи ХVI Шўрои Олии Ҷумҳурии Тоҷикистон ва нақши Пешвои миллат муҳтарам Эмомалӣ Раҳмон дар бунёди давлатдории миллӣ», ки дар шаҳри Хуҷанд доир шуд, аз шаҳру ноҳияҳои вилоят боздид намуда истодаанд. Аз ҷумла, меҳмонон дар шаҳри Хуҷанд Маҷмааи таърихиву фарҳангии «Қалъаи Хуҷанд», маҷмааи «Қалъаи Муғ»-и шаҳри Истаравшан, Коллеҷи ҳунарҳои мардумии шаҳри Истаравшан, ҶСП «Оби зулол», ҶСК «Қолинҳои Суғд», ҶДММ «Хубҷамъ инвест», корхонаи «Зари Суғд» ва ғайраҳо боздид намуда, бо маконҳои истироҳативу фароғатӣ ва таърихӣ, фаъолияти корхонаҳои азими саноатӣ шинос гардиданд.