2 апрели соли 2023 дар маркази маъмурии ноҳияи Кӯҳистони Мастчоҳ як гурӯҳ ҷавонони синни даъватӣ, ки ихтиёран ба комиссариати ҳарбии ноҳия ҳозир шудаанд, барои адои қарзи фарзандӣ дар назди Модар— Ватан ба сафи Қувваҳои Мусаллаҳи Ҷумҳурии Тоҷикистон гусел карда шуданд.
Тантанаи гусели наваскарон дар толори бинои мақомоти иҷроияи ҳокимияти давлатии ноҳияи Кӯҳистони Мастчоҳ сурат гирифта, дар он роҳбарияти ноҳия, роҳбарони сохторҳои қудратии ноҳия ва дигар масъулину фаъолон ширкат доштанд. Раиси ноҳия Бобозода Хайрулло дар рафти гусели ҷавонон суханронӣ намуда, таъкид кард, ки барои ҳар як ҷавон лозим аст, ки ин рисолати ҷавонмардии худро адо намояд.
Ҳамчунин гуфта шуд, ки имрӯз Қувваҳои Мусаллаҳи Ҷумҳурии Тоҷикистон рисолати хеш - ҳифзи Ватан ва ҳимояи давлатро иҷро мекунад ва аз ҷониби давлат барои будубоши хизматчиёни ҳарбӣ дар тамоми қисмҳои низомии мамлакат шароити арзанда муҳайё гардидааст.
Дар фарҷоми суҳбат раиси ноҳия аз ҳамаи ҷавонон ва падару модароне, ки фарзандони хешро дар рӯҳияи худогоҳиву худшиносӣ ва ифтихори миллӣ тарбия намудаанд, изҳори сипос намуда, ба ҳар як даъватшаванда, ки ихтиёран ба даъвати баҳорона ҳозир шудааст, тӯҳфаҳо тақдим кард.
