Сарвари давлат Эмомалӣ Раҳмон дар шаҳри Бӯстон обанбори шабакаи оби нӯшокиро мавриди истифода қарор доданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нахуст ба шаҳри Бӯстон ташриф оварда, обанбори шабакаи оби нӯшокиро бо ғунҷоиши 1000 метри мукааб барои таъмини беш аз 5000 ҳазор нафар аҳолии шаҳри Бӯстон мавриди истифода қарор доданд.

Тавре ба Сарвари давлат иттилоъ дода шуд, сохтмони иншооти оби нушокӣ марҳилаи навбатии татбиқи созишномаи сеҷонибаи Корхонаи воҳиди давлатии “Хоҷагии манзилию комуналии Ҷумҳурии Тоҷикистон”, Бонки Аврупоии таҷдид ва рушд ва “Лоиҳаи барқарорсозии шабакаҳои обтаъминкунии шаҳрҳои шимоли Тоҷикистон” маҳсуб меёбад, ки бо дастгирии Ҳукумати ҷумҳурӣ ба маблағи 18 миллиону 964 ҳазор доллари америкоӣ амалӣ шудааст.

Аз маблағи умумии лоиҳа 2 миллиону 885 ҳазор доллар ба барқарорсозии шабакаҳои обтаъминкунии шаҳри Бӯстон равона гардидааст.

Иншооти оби нушокӣ таъмини оби босифатро ба аҳолии маҳаллаи “Наврӯз” дар 20 хонаи баландошёнаи истиқоматӣ, 500 қитъаҳои нави наздиҳавлигӣ, муассисаҳои иҷтимоӣ ва кору хизматрасонии ин ҳудуди шаҳри Бӯстонро беҳтар менамояд.

Дар асоси лоиҳа иншоот аз 2 ҳавзи об бо ғунҷоиши ҳар яке 500 метри мукааб, хати оби нӯшокӣ ба масофаи 9 километр бо васлу насби қубурҳои полиэтилении қутрашон аз 20 то 200 миллиметра, 3 насоси обкашӣ, хати барқи озод ба масофаи 3 километр иборат мебошад.

Оби нӯшоки ба иншооти нави обрасонӣ аз обанбори асосии шаҳри Бӯстон тавассути хати оби нушокии қубурҳои қутрашон 600 миллиметра ба масофаи 2 километр интиқол дода мешавад.

Иттилоъ дода шуд, ки корҳои сохтмону васлгарӣ ва муҷаҳҳазгардонии хату иншооти оби нӯшокиро дар асоси фармоиши Корхонаи воҳиди давлатии “Хоҷагии манзилию комуналии Ҷумҳурии Тоҷикистон” коргарону муттахасисони Ҷамъияти дорои масъулияти маҳдуди “Ситоиш” анҷом додаанд.

Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ ба сифати корҳои анҷомдодашуда дар шабакаҳои обтаъминкунии шаҳри Бӯстони вилояти Суғд баҳои баланд доданд.

Татбиқи лоиҳаи “Барқарорсозии системаи обтаъминкунии шаҳрҳои “Шимоли Тоҷикистон” аз моҳи марти соли 2014 оғоз шуда, 6 шаҳру ноҳияҳои вилояти Суғдро дар бар мегирад. То имрӯз дар асоси ин лоиҳа дар шаҳрҳои Бӯстон, Гулистон, Истиқлол, Исфара, Конибодом ва ноҳияи Бобоҷон Ғафуров ҳаҷми асосии корҳо иҷро ва ба беҳтар гардидани таъмини оби нӯшкии тоза мусоидат намудааст.

Татбиқи лоиҳаи обтаъминкунӣ дар вилояти Суғд дар доираи ташаббусҳои ҷаҳонии Пешвои миллат муҳтарам Эмомалӣ Раҳмон дар самти ҳалли мушкилоти марбут ба норасоии об муҳиму саривақтӣ арзёбӣ гардид.