Бо талошҳову раҳнамоиҳои фарзандони хирадманди миллат, Қаҳрамонони Тоҷикистон, алломагон Садриддин Айниву Бобоҷон Ғафуров ва як зумра устодони санъат суруду оҳангҳои «Шашмақом» ба нота гирифта шуданд.
Дар асри ХХ дар тамоми марказҳои маъмуриву фарҳангии кишвар чанде аз устодони соҳибмактаб, монанди Ҳоҷӣ Абдулазиз, Левӣ Бобохонов, Содирхони Ҳофиз, Бобоқул Файзуллоев, Шоҳназар Соҳибов, Фазлиддин Шаҳобов ва дигарон дар ин кори хайр муваффақ шуданд.
Чунин тадбирҳо боис шуданд, ки минбаъд ҳунармандони машҳур, чун Барно Исҳоқова, Боймуҳаммад Ниёзов, Маъруфхўҷа Баҳодуров, Борис Наматиев, Ҷўрабек Муродов, Ҷўрабек Набиев, Мастона Эргашева ва дигарон ба майдони санъат омада, шашмақомсароиро ба авҷи тараққӣ расонанд.
Дар давраи Истиқлоли давлатӣ бо ташаббусҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷойгоҳи «Шашмақом» на танҳо дар миқёси ҷумҳурӣ, балки дар сатҳи ҷаҳонӣ низ вусъат пайдо намуд. Пешвои миллат дар паёмҳо, мулоқот бо зиёиёни кишвар, асару мақолаҳо ва суханрониҳои хеш доимо таъкид менамоянд, ки бояд анъанаҳои фарҳангии мусиқии халқи тоҷик, аз ҷумла, санъати мақомхонӣ рушду такомул ёбад ва имрўзиёну ояндагон тамоми намунаҳои санъати волои миллии моро гиромӣ дошта, ҷиҳати густариши ҳамаҷонибаи он саъю талош намоянд.
Аз баракати Истиқлоли давлатӣ ва сиёсати фарҳангпарваронаи Пешвои муаззами миллат «Шашмақом» ҳамчун мероси бебаҳои тоҷикон дар сатҳи Созмони бонуфузи ҷаҳонии ЮНЕСКО ҳамчун ёдгории маънавии умумибашарӣ эътироф шуд ва асолату шаҳомати азалиашро аз нав эҳё намуд.
Ташаббуси дигари Сарвари фарҳангпарвари мамлакат, муҳтарам Эмомалӣ Раҳмон барои пешрафти ин санъати баланд ташкили озмуни ҷумҳуриявии «Тоҷикистон-Ватани азизи ман» мебошад, ки ин сабқат ҷиҳати дарёфти истеъдодҳои нодир саҳми назаррас дорад.
Аз ин рў, мо ифтихорманд аз онем, ки савту навои безаволи ниёгони мо – «Шашмақом» мақоми ҷаҳонӣ пайдо карда, ба дили мардумони олам роҳ ёфтааст.
Боварӣ дорем, ки ҳунармандони вилоят минбаъд низ анъанаҳои неки санъати шашмақомхониро идома дода, барои ривоҷу равнақи санъат ва ҳунар, тарбияву камолоти истеъдодҳои ҷавон талош меварзанд.
Рўзи «Шашмақом» муборак, ҳамдиёрони азиз!
