22 апрел Раиси вилояти Суғд Раҷаббой Аҳмадзода дар шаҳри Истаравшан бо рафти корҳои ободонию бунёдкорӣ шинос шуд.

Ба истиқболи 35-солагии Истиқлоли давлатии Ҷумҳурии Тоҷикистон дар шаҳри Истаравшан бунёди иншооти гуногун, аз ҷумла корхонаҳои саноатӣ ҷараён дошта, соҳибкорони шаҳр саҳми арзандаи худро барои расидан ба ҳадафи чоруми миллӣ-саноатикунонии босуръати мамлакат гузошта истодаанд.

21 апрел Раиси вилояти Суғд Раҷаббой Аҳмадзода ба ноҳияи Мастчоҳ сафари корӣ анҷом дода,  бо раванди корҳои ободонию созандагӣ шинос гардид.

Раиси вилоят аз ҷумла бо сохтмони иншооти гуногун, аз ҷумла маркази хизматрасонӣ, фермаи чорвопарварӣ, фабрикаи парандапарварии ҶДММ "Некбахт", коргоҳи дӯзандагӣ, бинои иловагии маркази ташхисӣ ва табобатии "Сино" ошно шуда, барои иҷрои босифати корҳо ба масъулин тавсияҳо дод.

Дар ноҳияи Зафаробод бо ташаббуси соҳибкорони маҳаллӣ як пойгоҳи хурди обкашӣ фаъол ва 140 гектар замини бекорхобида ба гардиши кишоварзӣ дароварда шуд. Дар ин бора имрӯз, 9 апрел зимни сафари кории Раиси вилояти Суғд Раҷаббой Аҳмадзода ба ноҳияи Зафаробод иттилоъ дода шуд.

Тибқи иттилои масъулини ноҳияи Зафаробод дар партави дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти истифодаи самараноки замин, ба гардиши кишоварзӣ ворид намудани заминҳои бекорхобида, ташкили боғҳои интенсивӣ ва зиёд намудани ҷойҳои корӣ бо иқдоми соҳибкорони маҳаллӣ дар 150 гектар замин, ки солҳои зиёд инҷониб бекор хобида буд, боғҳои нави себ, олу ва чормағз бунёд карда шуд.

Дар Ҷамъияти дорои масъулияти маҳдуди «Спитамен» васлу насби хатти нави истеҳсолӣ ҷараён дошта, бо ба охир расидани корҳо ҳаҷми истеҳсоли маҳсулот зиёд ва маҳсулот ба кишварҳои Қазоқистону Ӯзбекистон содирот карда мешавад. Дар ин бора зимни боздиди Раиси вилояти Суғд Раҷаббой Аҳмадзода аз корхонаи мазкур иттилоъ дода шуд.

Ҷамъияти дорои масъулияти маҳдуди «Спитамен» аз калонтарин корхонаҳои саноатии ноҳияи Деваштич аст, ки бо тамғаи «Оҳаки Ғончӣ» маҳсулоти сохтмонӣ истеҳсол мекунад. Муассисони корхона бо назардошти панҷсолаи рушди саноат эълон шудани солҳои 2022-2026 тасмим гирифтанд, ки фаъолиятро тақвият бахшида, хатти навро фаъол созанд.

Дар ноҳияи Деваштич, ки аксари кишоварзонаш ба картошкапарварӣ машғул ҳастанд, ба кишти картошка оғоз бахшида шуд.

Раиси вилояти Суғд Раҷаббой Аҳмадзода зимни сафари корӣ ба ноҳия дар оғози кишти картошка иштирок карда, ба роҳбарияти ноҳия ва масъулони соҳаи кишоварзӣ бо ёдоварӣ аз дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавсия дод, ки бо истифода аз рӯзҳои мусоиди баҳорӣ ба кишти зироат ва дигар корҳои саҳроӣ вусъат бахшида шавад. Таъкид карда шуд, ки ҳар як оила бояд ба истифодаи оқилонаву самараноки замин, аз ҷумла заминҳои наздиҳавлигиву президентӣ диққати махсус дода, киштро сари вақт ба итмом расонад. Зеро сари вақт кишт намудани зироати гуногун барои ҳосили фаровон замина гузошта шуда, дар натиҷа фаровонии бозори истеъмолӣ таъмин мегардад.

Раиси вилояти Суғд Раҷаббой Аҳмадзода зимни сафари корӣ ба ноҳияи Спитамен ба хоҷагии деҳқонии «Миркамол» ташриф оварда, дар маъракаи кишти пахта иштирок намуд.

Дар ноҳияи Спитамен, ки аз навоҳии пахтакор маҳсуб меёбад, соли ҷорӣ тибқи нақша 6400 гектар пахта кишт хоҳад шуд. Бо гармшавии ҳаво корҳои саҳроӣ дар ноҳия вусъат ёфта, кишоварзон барои ба анҷом расонидани кишти баҳорӣ меҳнат намуда истодаанд.