Раиси вилояти Суғд Раҷаббой Аҳмадзода дар шаҳри Конибодом бошандагони Маркази хизматрасонии иҷтимоии мақомоти иҷроияи ҳокимияти давлатии шаҳрро аёдат карда, фарорасии Иди саиди Фитрро ба онҳо табрик гуфт.

Дар маркази мазкур ба 111 нафар хизмати иҷтимоӣ расонида шуда, нафароне, ки бо амри тақдир ба ғамхорӣ ниёз доранд,  нигоҳубин карда мешаванд.

Дар доираи сафари корӣ ба шаҳри Конибодом Раиси вилояти Суғд Раҷаббой Аҳмадзода оилаи Диловар Толибовро, ки ҳангоми адои хизмати ҳарбӣ қаҳрамонӣ нишон додааст, аёдат кард.

Диловар Толибов хатмкардаи Донишгоҳи олии Қушӯнҳои сарҳадӣ буд ва дар вақти хизмат барои ҳифзи манфиатҳои давлату миллат ҷоннисорӣ намудааст. Ба хотири гиромидошти хизматҳои марҳум кӯчае ба номи ӯ гузошта шудааст.

Дар шаҳри Конибодом сохтмони бинои маъмурии ҲХДТ дар шаҳр идома дошта, қариб 90 дарсади корҳо ба анҷом расонида шудааст. 

Зимни шиносоии Раиси вилояти Суғд Раҷаббой Аҳмадзода бо рафти корҳои сохтмонӣ маълумот дода шуд, ки сохтмони бинои маъмурӣ соли 2018 оғоз ёфта, рӯзҳои наздик ба анҷом расонида мешавад. Бинои маъмурӣ бо дастгирии мақомоти иҷроияи ҳокимияти давлатии шаҳр, саҳмгузории аъзои фаъоли ҳизб, соҳибкорону ташкилотҳои ибтидоӣ бунёд шуда, маблағи лоиҳавии он беш аз 1 миллион сомониро ташкил медиҳад. Бинои маъмурии Кумитаи иҷроияи Ҳизби Халқии Демократии Тоҷикистон дар кўчаи ба номи Исмоили Сомонии шаҳр ҷойгир буда, бо мавриди истифода қарор гирифтани он барои кормандони ҳизб шароити мусоиди корӣ фароҳам оварда хоҳад шуд.

28 апрели соли ҷорӣ Раиси вилояти Суғд Раҷаббой Аҳмадзода бо мақсади шиносоӣ бо ҷараёни корҳои ободониву бунёдкорӣ аз шаҳри Конибодом боздид намуд.

Раиси вилоят дар доираи сафар сараввал бо рафти бунёди иншооти соҳаи маориф шинос гардид. Чуноне маълумот дода шуд, тибқи нақша ба истиқболи 35-солагии Истиқлоли давлатии Ҷумҳурии Тоҷикистон дар шаҳри Конибодом бунёди 40 адад иншооти соҳаи маориф дар назар дошта шуда, дар муассисаҳои таълимӣ қариб 5 ҳазор ҷойи нишаст ташкил мегардад. Дар ин самт корҳо оғоз ёфта, бунёди мактабу кӯдакистонҳо бомаром идома дорад. Аз ҷумла, дар Ҷамоати деҳоти ба номи Абулқосим Лоҳутӣ сохтмони кӯдакистони нав идома дорад, ки барои 120 нафар пешбинӣ шудааст. Кӯдакистони нав бо дастгирии мақомоти иҷроияи ҳокимияти давлатии вилояту шаҳр ва саҳмгузории аҳолӣ сохта шуда, барои иҷрои корҳои сохтмонӣ дар маҷмуъ беш аз 3 миллион сомонӣ равона карда мешавад. Айни замон дар шаҳр 22 кӯдакистон фаъолият дошта, 4400 нафар хурдсолон ба таълиму тарбия фаро гирифта шудаанд.

Раиси вилояти Суғд Раҷаббой Аҳмадзода дар шаҳри Хуҷанд аз муассисаи хусусии тиббии хизматрасонии «Ортопедия ва технологияи муосир» боздид намуда, бо раванди хизматрасонӣ ба беморон ва шароити ин муассисаи нави тиббӣ аз наздик шинос гардид.

Иттилоъ дода шуд, ки он аз ҷониби соҳибкорӣ ватанӣ Фарҳод Ҳакимов таъсис дода шуда, сардухтури муассиса Шамсиддин Тошматов мебошад. Дар маркази хизматрасонии тиббӣ духтурони соҳибтаҷрибаи осебшиносӣ сарҷамъ гардида, дар як шабонарўз метавонанд то ба 30 нафар беморон хизмат расонанд.

Бахшида ба ҷашни 25-солагии Ваҳдати миллӣ ва 30 — солагии Иҷлосияи 16-уми Шўрои Олии Ҷумҳурии Тоҷикистон ва Солҳои рушди саноат эълон гардидани солҳои 2022-2026 дар шаҳри Хуҷанд як қатор корхонаҳои саноатӣ бунёд ва ба истифода дода мешаванд.

Имрўз Раиси вилояти Суғд Раҷаббой Аҳмадзода бо рафти бунёди як зумра корхонаҳои нави истеҳсолӣ дар ҳудуди шаҳри Хуҷанд шинос гардид. Нахуст роҳбари вилоят сохтмони корхонаи бузурги саноатии истеҳсоли халтаҳои ҳаҷман калонро, ки дар минтақаи озоди иқтисодии “Суғд” ҷойгир аст, мавриди таваҷҷуҳ қарор дод.