Имрӯз дар шаҳри Хуҷанд мулоқоти ҳайатҳои расмии вилояти Суғди Ҷумҳурии Тоҷикистон ва вилояти Бодканди Ҷумҳурии Қирғизистон баргузор гардид. 

Ҳайати вилояти Бодканди Ҷумҳурии Қирғизистон бо роҳбарии намояндаи ваколатдори Президенти Ҷумҳурии Қирғизистон дар вилояти Ботканд Абдикарим Алимбаев ба вилояти Суғд ташриф овард.

Мулоқоти ҷонибҳо бо иштироки роҳбарони вилоятҳо, мақомоти ҳифзи ҳуқуқ, раисони шаҳру ноҳияҳои наздисарҳадӣ дар қароргоҳи Сарвари давлат ҷараён гирифт. 

Зимни суҳбат таъкид карда шуд, ки бо сиёсати пешгирифтаи роҳбарони давлатҳо Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров муносибатҳои дӯстона миёни вилояти Суғд ва вилояти Бодканд таҳким ёфта, ба тақвияти ҳамкориҳо аҳмияти аввалиндараҷа зоҳир мегардад. Зеро муносибати неки ҳамсоядорӣ омили асосии густариши робитаҳо ба ҳисоб меравад.

Имрӯз Раиси вилояти Суғд Раҷаббой Аҳмадзода бо мушовири махсуси роҳбари ширкати "Тибет Эверест" Ян Чжи Сай мулоқот намуд.

Дар мулоқот фаъолияти кунунии Ширкати куҳӣ-саноатии Тоҷикистону Хитой мавриди таҳлил қарор дода шуд.

Таъкид шуд, ки Ширкати куҳӣ-саноатии Тоҷикистону Чин аз калонтарин корхонаҳои саноатии вилояту ҷумҳурӣ ба ҳисоб рафта, саҳми он дар пешрафти саноат назаррас аст. Дар корхона асосан консентрати сурб ва консентрати руҳ истеҳсол мешавад ва дар он беш аз 3 ҳазор нафар соҳиби ҷойи корӣ мебошанд.

Ҷонибҳо амалӣ намудани тарҳҳои нав, воридсозии технологияҳои муосир ва афзун намудани ҳаҷми истеҳсоли маҳсулотро зарур шуморида, ёдовар шуданд, ки иқтидорҳои истеҳсолӣ бояд самаранок истифода бурда шавад.

13 декабр Раиси вилояти Суғд Раҷаббой Аҳмадзода роҳбари ширкати машваратии итолиёвии "Keios" Питер Низет ва ҳамроҳонашро ба ҳузур пазируфт. 

Тавре маълумот дода шуд, ширкати итолиёвии "Keios" ширкати сайёҳӣ буда, ҳадаф аз ташрифи меҳмонон шиносоӣ бо имкониятҳои сайёҳӣ мебошад. 

Раиси вилоят зимни суҳбат изҳор дошт, ки дар Ҷумҳурии Тоҷикистон дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи сайёҳӣ таваҷҷуҳи хоса зоҳир гардида, солҳои 2019-2021 дар мамлакат "Солҳои рушди деҳот, сайёҳӣ ва ҳунарҳои мардумӣ" эълон шуда буд. Дар ин солҳо инфрасохтори соҳа беҳтар гардида, барои ҷалби ҷаҳонгардон чораҳои муассир амалӣ карда шуд. Дар натиҷа шумораи сайёҳон зиёд шуда, ҳамасола садҳо ҳазор нафар аз маконҳои зебову нотакрори Тоҷикистон боздид менамоянд. 

12 декабри соли 2023 дар шаҳри Бодканди Ҷумҳурии Қирғизистон мулоқоти ҳамраисони ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба муайянкунӣ ва аломатгузории сарҳади давлатии Тоҷикистон ва Қирғизистон Саймумин Ятимов ва Қамчибек Ташиев баргузор гардид.

Зимни мулоқот роҳбарон натиҷаҳои фаъолияти гурӯҳҳои кории топографӣ ва ҳуқуқии ҳайатҳои ҳукуматии Ҷумҳурии Тоҷикистон ва Ҷумҳурии Қирғизистонро оид ба муайянкунӣ ва аломатгузории сарҳади давлатии Тоҷикистон ва Қирғизистон дар соли 2023 баррасӣ намуда, доир ба пурзӯр намудани корҳо оид ба анҷом додани таъйини хати гузаргоҳи лоиҳавии сарҳади давлатии Тоҷикистон ва Қирғизистон дар қитъаҳои боқимонда супоришҳои мушаххас доданд.

Раиси вилояти Суғд Раҷаббой Аҳмадзода дар шаҳри Москваи Федератсияи Россия бо Президенти Палатаи савдо ва саноати Федератсияи Россия Сергей Катирин мулоқот намуд. 

Зимни суҳбат ҷонибҳо аз таҳкими равобити дӯстона, ки дар дар доираи созишномаҳои ҳамкорӣ ба роҳ монда шудааст, изҳори қаноатмандӣ намуданд. 

Раиси вилояти Суғд Раҷаббой Аҳмадзода густариши ҳамкориҳои мутақобилан судмандро самараи сиёсати пешгирифтаи роҳбарони давлатҳо Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия муҳтарам Владимир Путин арзёбӣ карда, барои дар сатҳи баланд ташкил намудани намоиши маҳсулоти дар вилояти Суғд истеҳсолшаванда ва фароҳам овардани шароити мусоид ҷиҳати мулоқот бо соҳибкорону тоҷирони Федератсияи Россия ба роҳбарияти Палатаи савдо ва саноати Федератсияи Россия изҳори сипос кард. 

Раиси вилояти Суғд Раҷаббой Аҳмадзода бо Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Валихон Турахонов мулоқот намуд.

Зимни суҳбат ҷонибҳо аз сатҳи кунунии муносибатҳои дуҷониба изҳори қаноатмандӣ карда, таъкид доштанд, ки бо сиёсати оқилонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қазоқистон муҳтарам Қосим-Жомарт Токаев ду кишвари ба ҳам дӯст робитаҳои хуби иқтисодӣ ва фарҳангӣ доранд.

Маълумот дода шуд, ки дар нуҳ моҳи соли равон гардиши молу маҳсулот миёни вилояти Суғд ва Ҷумҳурии Қазоқистон 602,1 миллион долларро ташкил додааст. Доираҳои тиҷоратии ду тараф ҳамкории самаранок доранд ва як қатор лоиҳаҳои муштаракро амалӣ намудаанд.

Раиси вилоят Раҷаббой Аҳмадзода омодагии худро барои тавсеаи бештари ҳамкорӣ изҳор дошта, доир ба имкониятҳои вилоят дар бахшҳои саноату кишоварзӣ ва фазои мусоиди сармоягузорӣ маълумот дод.