23 октябр дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз сафирони нави фавқулода ва мухтори якчанд давлати хориҷӣ эътимоднома қабул намуданд.

Зимни маросим ба Президенти Ҷумҳурии Тоҷикистон муҳтарам Эмомалӣ Раҳмон сафирони фавқулода ва мухтори Туркманистон Аймурад Кочмурадов, Ҷумҳурии Исломии Эрон Алиризо Ҳақиқиён, Ҷумҳурии Исломии Покистон Муҳаммад Саид Сарвар, Ҷумҳурии Федеративии Олмон Йорк Шуграф, Ҷумҳурии Фаронса хонум Элза Пинёл, Конфедератсияи Швейтсария Салман Бал, Муғулистон Доржийн Баярхуу, Ҷумҳурии Сотсиалистии Ветнам хонум Фам Тхай Нии Май, Ҷумҳурии Филиппин хонум Мария Агнес Магласанг Сервантес ва Ҷумҳурии Мардумии Демократии Корея Син Хон Чхол эътимодномаҳоро бо паёму дуруд аз роҳбарияти давлатҳои хеш тақдим намуданд.

Президенти мамлакат муҳтарам Эмомалӣ Раҳмон зимни суханронӣ ҳамаи сафиронро ба муносибати таъйин гардиданашон ба ин маснади сермасъул дар Ҷумҳурии Тоҷикистон самимона табрику таҳният гуфта, бо итминон иброз доштанд, ки фаъолияти самараноки онҳо омили муассири рушду таҳкими муносибатҳои дӯстӣ ва ҳамкории гуногунсоҳа байни давлатҳо хоҳад гардид.

21 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ ба вилояти Хатлон дар ноҳияи Муъминобод парваришгоҳи ҳайвоноти нодирро ба истифода дода, бо намоиши маҳсулоти хоҷагии ҷангали ноҳия шинос шуданд.

Масоҳати умумии парваришгоҳ 363 гектар буда, ин мавзеи ноҳияи Муъминобод барои парвариши ҳайвоноти нодир дорои иқлими мусоид мебошад.

Ба Пешвои миллат муҳтарам Эмомалӣ Раҳмон иттилоъ дода шуд, ки дар ҷангалҳои ноҳия ҳайвоноти ваҳшӣ, аз қабили хирс, рубоҳ, гург, қашқалдоқ, силовсин ва парандаҳои мухталиф, аз ҷумла лочин, боз ва уқоб мавҷуд аст.

21 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Муъминободи вилояти Хатлон роҳи автомобилгарди дорои аҳамияти маҳаллии Муъминобод-Ғеш-Чилдухтаронро мавриди истифода қарор доданд.

Роҳи мазкур дар доираи нақшаи чорабиниҳо бахшида ба ҷашни 35-солагии Истиқлоли давлатии Ҷумҳурии Тоҷикистон ва дастуру супоришҳои Сарвари давлат муҳтарам Эмомалӣ Раҳмон аз ҷониби роҳбарияти Ҷамъияти дорои масъулияти маҳдуди «Заркорон» дар муддати кӯтоҳ ва мувофиқ ба меъёрҳои сохтмонии муосир бунёд гардидааст.

Ба Пешвои миллат муҳтарам Эмомалӣ Раҳмон иттилоъ доданд, ки масофаи роҳи сохташуда 12 километрро ташкил дода, корҳои сохтмонӣ бо харҷи 10 миллиону 400 ҳазор сомонӣ анҷом дода шудаанд. Роҳи мазкур ба категорияи 4-уми роҳдорӣ шомил мебошад. Дар таъмиру таҷдиди роҳ асосан мутахассисон ва коргарони маҳаллӣ ҷалб гардида, бо маоши хуб таъмин буданд.

21 октябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Комплекси агросаноатии Ҷамъияти дорои масъулияти маҳдуди “Заркорон” ҳамчунин ба фаъолияти корхонаи парандапарварӣ оғози расмӣ бахшиданд.

Корхона дар масоҳати 600 метри мураббаъ бунёд шуда, дар он мурғи навъи бройлер парвариш мешавад. Ҳоло дар ин сех 4500 сар мурғ парвариш ёфта, раванди нигоҳубини чӯҷаҳо тариқи автоматӣ ба роҳ монда шудааст. Мурғи гӯштӣ то 45 рӯз парвариш ва баъдан забҳ мешавад. Вазни меъёрии мурғи бройлер то 2,2 килограмм буда, ҳамчун гӯшти парҳезӣ ба бозорҳои дохилӣ содирот мегардад. Иқтидори истеҳсолии корхона дар як сол мувофиқи дурнамо, зиёда аз 100 тоннаро ташкил дода, дар марҳилаҳои баъдӣ ҳаҷми истеҳсолот зиёд хоҳад шуд.

21 октябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Муъминобод дар деҳаи Гулистони Ҷамоати деҳоти ба номи Нуралишоҳ Назаров ба Комплекси агросаноатии Ҷамъияти дорои масъулияти маҳдуди “Заркорон” ташриф оварда, бо нашъунамои боғоти пиставу олуи сиёҳи содиротӣ, намоиши маҳсулоти кишоварзӣ ва намунаи чорвои хушзоту парандаҳои нодир шинос шуданд. Маҷмааи агросаноатӣ дар масоҳати 20 гектар соли 2021 бунёд ёфтааст.

Ба Сарвари давлат иттиллоъ дода шуд, ки аз маҷмуи заминҳои дар ихтиёрдоштаи ҷамъият 5 гектараш боғи писта, 4 гектар олуи сиёҳ, 5 гектар боғи интенсивӣ ва боқимондаро боғоти гелосу зардолу ташкил медиҳад. Ташкили боғот дар ин мавзеъ бо назардошти талаботи замон бунёд шуда, дар ин ҷо ниҳоли меваҷоте парвариш меёбанд, ки ҳамагӣ содиротӣ мебошанд.

21 октябр Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази ноҳияи Муъминобод Муассисаи ғайридавлатии таълимии “Коллеҷи тиббии хусусӣ”-ро мавриди баҳрабардорӣ қарор доданд.

Муассиса аз ҷониби соҳибкор Давлаткарим Сафаров дар муҳлати кӯтоҳ сохта, ба истифода дода шуд. Иттилоъ дода шуд, ки Муассисаи ғайридавлатии таълимии “Коллеҷи тиббии хусусӣ” дар асоси дастуру ҳидоятҳои Пешвои миллат муҳтарам Эмомалӣ Раҳмон ва дар доираи нақшаҳои созандагӣ ба хотири таҷлили шоистаи ҷашни 35-солагии Истиқлоли давлатии мамлакат бунёд шуда, барои 500 донишҷӯ дар ду баст пешбинӣ гардидааст. Дар муассисаи нави таълимии касбӣ, ки ҷиҳати баровардани эҳтиёҷи ноҳияи Муъминобод ва дигар минтақаҳои ҷумҳурӣ бо кадрҳои миёнаи тиббӣ муҳим мебошад, 2 факултет аз рӯи ихтисоси кори ҳамширагӣ ва момодоягӣ фаъол шуданд.