13 апрел мақомоти иҷроияи ҳокимияти давлатии шаҳри Бӯстон аз иҷрои нақшаи даъвати ҷавонон ба сафи Қувваҳои Мусаллаҳи Ҷумҳурии Тоҷикистон гузориш дод. 

Роҳандозии тадбирҳои судманд ва ба роҳ мондани корҳои тарғиботиву ташвиқотӣ, анҷом додани мулоқоту вохӯриҳо бо насли ҷавон ва волидайни онҳо, баргузории силсилаи чорабиниҳои маърифатӣ, фарҳангӣ ва варзишӣ, рӯзи дарҳои кушод дар қисмҳои ҳарбӣ ва дигар чорабиниҳои ҳадафманд имкон дод, ки шаҳри Бӯстон пеш аз муҳлат нақшаи даъвати навбатии шаҳрвандони солҳои таваллуди 1998-2006 Ҷумҳурии Тоҷикистон ба хизмати ҳарбиро ба пуррагӣ иҷро намояд. 

“Ман ба Шумо сулҳ меоварам!” ин аввалин Паёми Пешвои муаззами миллат Эмомалӣ Раҳмон дар мақоми Раиси Шӯрои Олӣ ва Сарвари давлат ба мардуми Тоҷикистон буд ва воқеан ҳам, дар фурсати кӯтоҳтарин танини шодии оштиву созиш, сулҳу ваҳдати миллӣ навиди бозгашт ба асолати зиндагӣ гашт. Баъди расидан ба сулҳу субот дар кишвар, тарҳи сулҳи тоҷикон мавриди омӯзиш қарор гирифта, ҳамчун намунаи барҷастаи фарҳанги сулҳофаринӣ дар саросари ҷаҳон эътироф шуд.

Имрӯз Ҳукумати Ҷумҳурии Тоҷикистон сиёсати сулҳпарваронаи хешро идома бахшида, хостори таҳкими сулҳ дар арсаи ҷаҳон аст. Ин аст, ки дар иҷлосияи 79-уми Маҷмаи умумии Созмони Милали Муттаҳид ташаббуси навбатии ҷаҳонии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар пешниҳоди қабули қатъномаи махсуси Созмони Милали Муттаҳид дар робита ба «Даҳсолаи таҳкими сулҳ ба хотири наслҳои оянда» садо дод. Воқеан, ин ташаббуси Сарвари давлат паёми зиндагисоз ва фардоофарин аст. Ҳифзи сулҳ ва ваҳдати миллӣ ҳамеша дар маркази сиёсати давлат ва ҷомеа қарор гирифтааст ва мусаллам аст, ки ин омил Тоҷикистонро ба як кишвари пешрафта ва муосир табдил хоҳад дод.