1 апрел як гурӯҳ ҷавонони синни даъватии ноҳияи Кӯҳистони Мастчоҳ ба хизмати ҳарбӣ гусел карда шуданд.

Тавре аз мақомоти иҷроияи ҳокимияти давлатии ноҳия хабар доданд, бахшида ба Рӯзи даъватшаванда дар маркази маъмурии ноҳия- шаҳраки Меҳрон маросими гусели ҷавонон ба сафи Қувваҳои мусаллаҳ баргузор шуд. Нахуст ҷавонон бо шиору овезаҳо роҳпаймоӣ намуданд.

Дар ҷамъомад роҳбарияти ноҳия, кормандони комиссариати ҳарбӣ, роҳбарони ташкилоту муассисаҳо ва наваскарону волидайни онҳо иштирок доштанд.

Иброз гардид, ки хизмати ҳарбӣ мактаби бузурги мардонагӣ ва далериву шуҷоат буда, кас дар ин марҳила ҳам руҳан ва ҳам ҷисман обу тоб ёфта, ба камол мерасад. Ҳар ҷавоне, ки дар худ эҳсоси ватандӯстӣ ва хештаншиносӣ дорад, бояд худро барои рафтан ба хизмати ҳарбӣ масъул шуморад ва дар ҳифзи ин меҳани биҳиштосо ҳисса гузорад. Ҳоло зери роҳбарии Пешвои миллат муҳтарам Эмомалӣ Раҳмон шароити будубоши сарбозон дар тамоми қисмҳои ҳарбии мамлакат беҳтар гардидааст.

1 апрел дар Кохи фарҳанги «Суғдиён»-и шаҳри Хуҷанд бахшида ба ҷашни байналмилалии Наврӯз таҳти унвони «Наврӯз иди занони ваҳдатсаро» Форуми байналмилалии занон оғоз ёфт.

Дар форум намояндагон аз Ҷумҳурии Қирғизистон, Узбекистон ва Тоҷикистон иштирок доранд.

Ҳадафи асосии ин форум фароҳам овардани фазои идона ва таҳкими ваҳдати занон, нақши занон дар ҳифз ва нигаҳдошти анъанаҳои миллӣ, мубодилаи таҷриба дар самти соҳибкории занон мебошад.

Дар назар аст зимни форум масъалаҳои суннатҳои муштараки мардуми Осиёи Марказӣ, нақши ҷашни Наврӯз дар таҳкими равобити дӯстонаи давлатҳои Осиёи Марказӣ, инчунин саҳми занон дар таҳкими сулҳ ва рушди иқтисодии минтақа баррасӣ гардад.