29 январи соли ҷорӣ дар маркази ноҳияи Зафаробод - шаҳраки Зафаробод ҷашни Сада таҷлил карда шуд. 

Дар чорабинии идона таъкид гардид, ки Сада 50 рӯз пеш аз фарорасии Наврӯз, яъне рӯзи 10 – уми баҳманмоҳ мувофиқ ба санаи 30 – юми январ ҷашн гирифта мешуд ва имрӯзҳо бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ҷашни Сада баробари дигар маросиму суннатҳои аҷдодии мо умри дубора пайдо карда, ҳамасола ҳамчун иди миллӣ ҷашн гирифта мешавад.

Дар идгоҳ аз ҷониби сокинони ноҳия, кишоварзон, бонувони ҳунарманд, устодону шогирдони муссисаҳои таълимӣ, сокинони ҷамоатҳои шаҳраку деҳот, намоиши техникаи кишоварзӣ, намоиш ва фурӯши ниҳол, тухмии зироатҳо ва таомҳои миллӣ пешниҳод гардида, ҳамчунин фурӯши маҳсулоти кишоварзӣ ба роҳ монда шуд. Дар идомаи ҷашн ба як чанд нафар фаъолон ва кишоварзон Сипоснома ва туҳфаҳо тақдим карда шуд.