Дар доираи иқдоми фарҳангии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон шоҳасари безаволи адабиёти классикии тоҷик — «Шоҳнома»-и Ҳаким Абулқосим Фирдавсӣ ба ноҳияи Ҷаббор Расулов расид. Тибқи нақша, ин туҳфаи пурарзиш ба 25 ҳазору 325 хонаводаи ноҳия аз ҷониби гурӯҳи кории Ҳукумати Ҷумҳурии Тоҷикистон тақсим карда мешавад. 

Ин иқдом ба ифтихори 35-солагии Истиқлоли давлатии Ҷумҳурии Тоҷикистон амалӣ гардида, ҳадаф аз он таҳкими ҳувияти миллӣ, эҳёи ҳофизаи таърихӣ, боло бурдани худшиносию ватандӯстӣ ва арҷгузорӣ ба мероси адабӣ ва фарҳангии гузаштагон мебошад.

Сокинони ноҳия ҳангоми дарёфти ин туҳфаи маънавӣ бо эҳсоси ифтихор изҳор доштанд, ки ин иқдоми фарҳангпарваронаи Пешвои миллат муҳтарам Эмомалӣ Раҳмон дар таҳкими худшиносии миллӣ ва эҳёи руҳияи ватандӯстӣ нақши муҳим мегузорад.

Фестивали байналмилалии «Сӯзании Панҷакент», ки рӯзҳои 12–13 декабр баргузор гардид, бо маросими тантанавии тақдими Шаҳодатномаи Шаҳри байналмилалии ҳунармандӣ ба шаҳри Панҷакент анҷом ёфт.

Ҳамакнун, шаҳри бостонии Панҷакент расман ҳамчун Шаҳри ҷаҳонии ҳунарҳои дастӣ барои сӯзанидӯзӣ эътироф гардид.

Муовини Раиси вилояти Суғд Ҷамшед Ҷӯразода ҳозиринро аз номи муовини якуми Раиси Маҷлиси миллии Маҷлиси Олии Ҷумҳурии Тоҷикистон, Раиси вилояти Суғд Раҷаб Аҳмадзода бо ин рӯйдоди муҳим шодбош гуфта, онро дастоварди арзишманди фарҳангӣ ва ҳунарии кишвар арзёбӣ намуд.

Зимни суханрониҳо намояндаи Вазорати фарҳанги Ҷумҳурии Тоҷикистон Хуршед Низомӣ, президенти Шӯрои байналмилалии ҳунармандӣ Саад-ал-Қаддумӣ ва директори департаменти Бозори ҷаҳонии ҳунармандӣ Надия Ҳамид шомил шудани Панҷакент ба феҳристи Шаҳрҳои байналмилалии ҳунармандиро натиҷаи дастгирии пайвастаи Ҳукумати Ҷумҳурии Тоҷикистон арзёбӣ карданд.