Дар Мақомоти иҷроияи ҳокимияти давлатии ноҳияи Мастчоҳ вохӯрии вакили Маҷлиси намояндагони Маҷлиси Олии Ҷумҳурии Тоҷикистон Ғайрат Азиззода бо интихобкунандагон баргузор гардид. Дар ин хусус аз Мақомоти иҷроияи ҳокимияти давлатии ноҳияи Мастчоҳ хабар доданд.

Вакили Маҷлиси намояндагон доир ба нуктаҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ», ташаббусҳои байналмилалии Пешвои миллат, санадҳои меъёрию ҳуқуқии қабулнамудаи мақоми олии қонунбарори мамлакат ва дастовардҳои муҳими даврони соҳибистиқлолӣ ибрози андеша намуд.

Соҳаи кишоварзӣ яке аз бахшҳои калидии иқтисоди миллии Ҷумҳурии Тоҷикистон ба ҳисоб рафта, дар таъмини амнияти озуқаворӣ, рушди иҷтимоию иқтисодӣ ва баланд бардоштани сатҳи зиндагии аҳолӣ нақши ҳалкунанда дорад. Ин нукта бори дигар дар Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар, ки 16 декабри соли ҷорӣ ироа гардид, таъкид шуд.

Тавре дар Паём зикр гардид, бо вуҷуди тағйирёбии иқлим, аз ҷумла ҳарорати баланди ҳаво, хокборишҳои шадид ва дигар омилҳои номусоиди табиӣ, кишоварзони мамлакат дар соли 2025 бо заҳмати софдилона ва ватандӯстона тавонистанд суръати рушди соҳаи кишоварзиро ба 8,5 фоиз расонанд. Ин нишондиҳанда далели равшани устуворӣ ва қобилияти мутобиқшавии соҳа ба шароити мураккаб буда, фаровонии бозори истеъмолии дохилиро таъмин намуд.