Дар маҷлисгоҳи гимназияи рақами 1 –и шаҳри Хуҷанд бо иштироки муовини Раиси вилоят Зайнура Азимӣ, муовинони раисони шаҳру навоҳӣ, кормандон ва сарварони зерсохторҳои Раёсати маорифи вилоят, сардорони Раёсат ва мудирони шуъбаҳои маорифи шаҳру навоҳӣ ҷаласаи навбатии мушовараи Раёсати маорифи вилоят доир гардид.

Сардори Раёсати маорифи вилоят Мадина Набизода ҷаласаро  ифтитоҳ бахшида, доир ба натиҷаҳои фаъолият дар се моҳи соли 2022 ҳисобот дод. Дар баромад таъкид шуд, ки маорифчиёни вилояти Суғд дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни ироаи Паёми навбатӣ ба Маҷлиси Олии мамлакат баён шуда буд, дар ҳама ҷабҳаҳои фаъолият саъйю талош варзида, дар давраи сипаришуда ба натиҷаҳои назаррас  соҳиб гардиданд. Дар ин пешравиҳо саҳми Вазорати маориф ва илми Ҷумҳурии Тоҷикистон  ва мақомоти иҷроияи ҳокимияти давлатии вилоят хеле калон аст.

Хонандагони мактабҳои вилояти Суғд дар даври ҷумҳуриявии олимпиадаҳои фаннӣ аз фанҳои ҷамъиятӣ-гуманитарӣ ва олимпиада аз фанни технологияи иттилоотӣ ба номи Ал-Хоразмӣ барои хонандагони синфи 11-и муассисаҳои таҳсилоти миёнаи умумӣ иштирок карда, соҳиби 75 ҷойи ифтихорӣ шуданд.

Тавре аз Вазорати маориф ва илми мамлакат хабар доданд, дар ҷамъбасти олимпиадаҳо аз фанҳои ҷамъиятӣ-гуманитарӣ ва олимпиада аз фанни технологияи иттилоотӣ ба номи Ал-Хоразмӣ хонандагони шаҳри Душанбе сазовори 116 ҷойи ифтихорӣ (23 ҷойи якум, 26 ҷойи дуюм, 67 ҷойи сеюм) мақоми якум, вилояти Суғд сазовори 75 ҷойи ифтихорӣ (8 ҷойи якум, 23 ҷойи дуюм, 44 ҷойи сеюм) мақоми дуюм, вилояти Хатлон сазовори 67 ҷойи ифтихорӣ (9 ҷойи якум, 26 ҷойи дуюм, 32 ҷойи сеюм) мақоми сеюм гардида, шаҳру ноҳияҳои тобеи ҷумҳурӣ сазовори 22 ҷойи ифтихорӣ (3 ҷойи якум, 5 ҷойи дуюм, 14 ҷойи сеюм) ва Вилояти Мухтори Кӯҳистони Бадахшон сазовори 16 ҷойи ифтихорӣ (2 ҷойи якум, 6 ҷойи дуюм, 8 ҷойи сеюм) гардиданд.