23 май дар вилояти Суғд Рӯзи ҷавонони Тоҷикистон ҷашн гирифта мешавад

23 майи соли равон дар вилояти Суғд Рӯзи ҷавонони Тоҷикистон таҳти унвони «Ҷавонон-пайравони Пешвои миллат!» таҷлил карда мешавад.

Дар доираи таҷлили Рӯзи ҷавонон ташкили Фестивали дӯстии ҷавонон дар шаҳру ноҳияҳои вилоят, барномаҳои фарҳангиву фароғатӣ таҳти унвони «Дунё пур аз ҷавонист», озмуни «Дастони моҳир», озмуни мақола ва иншои беҳтарин дар мавзӯи «Пешвои миллат ва ҷавонон», ҳамоишҳои «Созандагиву ободкорӣ мароми мо ҷавонон», «Мо-ҷавонон ба гузаштагони худ эҳтиром мегузорем», «Тозагии соҳил-гарави саломатӣ», «Ҷавонон-пайравони Пешвои миллат», мусобиқаҳои кушоди вилоятӣ аз рӯи намудҳои тенниси рӯи миз, шоҳмот, велосипедронӣ, баскетбол, гӯштини юнонӣ-румӣ, гӯштини камарбандӣ, камонварӣ, ҷудо, волейбол, каратэ, бокс, футбол ва ғайраҳо дар назар дошта шудааст. 

Панҷакент. Ба иштирокчии ҶБВ кӯмакпулии Президенти мамлакат супорида шуд

5 май муовини вазири тандурустӣ ва ҳифзи иҷтимоии аҳолӣ Шодихон Ҷамшед, сардори раёсати тандурустии вилояти Суғд Ҳабибулло Хайруллозода ва раиси шаҳри Панҷакент Абдухолиқ Холиқзода ба манзили зисти иштирокчии Ҷанги Бузурги Ватанӣ Бӯриев Саид ташриф оварда, фарорасии 77-умин солгарди Рӯзи Ғалабаро табрику таҳният гуфтанд.

Зимни аёдат ба иштирокчии Ҷанги Бузурги Ватанӣ Бӯриев Саид кӯмакпулии якдафъаинаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ба маблағи 15 000 сомонӣ, кӯмакпулии Раиси вилояти Суғд Раҷаббой Аҳмадзода ба маблағи 6000 сомонӣ ва кӯмакпулии раиси шаҳри Панҷакент Абдухолиқ Холиқзода ба маблағи 2000 сомонӣ тақдим карда шуд.

Дар ноҳияи Ашт иштирокчиёни Ҷанги дуюми ҷаҳониро аёдат намуданд

Ду нафар иштирокчӣ ва маъюби Ҷанги дуюми ҷаҳонӣ, ки кунун дар Ҷамоати деҳоти Понғози ноҳияи Ашт бо шукргузорӣ аз суботи комили  кишвар зиндагӣ доранд, дар арафаи Рӯзи Ғалаба- 9 май аёдат гардиданд. Дар ин бора аз мақомоти иҷроияи ҳокимияти давлатии ноҳияи Ашт хабар доданд.

Ба иштирокчиёни Ҷанги дуюми ҷаҳонӣ Қучқор Ҳоҷиматов (15.06.1926, деҳаи Саро)  ва Абдуқодир Холматов (02.05.1925, деҳаи Бободархон) кумаки яквақтаи Пешвои миллатро муовини Вазири тандурустӣ ва ҳифзи ичтимоии аҳолӣ Ҷамшед Шодихон, кумакпулии раиси вилоят Раҷаббой Аҳмадзодаро сардори Раёсати тандурустӣ Муҳиддин Ҳайруллозода ва кумакпулии яквақтаро Раиси ноҳияи Ашт Шӯҳрат Муҳаммадзода дар вазъияти тантанавӣ супориданд.