Дар Хуҷанд мумфаршкунӣ ва таъмири роҳҳо оғоз ёфт

Бо нисбатан гарм шудани ҳаво дар шаҳри Хуҷанд мумфаршкунӣ ва таъмири роҳҳо оғоз ёфт.

Раиси вилояти Суғд Раҷаббой Аҳмадзода дар хиёбони Исмоили Сомонӣ ба корҳои роҳсозӣ оғоз бахшида, барои таъмиру мумфаршкунии роҳҳои дохилӣ, тозаву озода нигоҳ доштани кӯчаву хиёбонҳо ба роҳбарияти шаҳр ва масъулини Идораи хоҷагии роҳҳои автомобилгарди вилоят ва идораи хоҷагии манзиливу коммуналӣ супоришҳо дод. 

Ба иттилои мутахассисон дар минтақаҳои гуногуни шаҳр давоми чан рӯзи оянда беш аз 20 ҳазор метри мураббаъ роҳ мумфарш карда хоҳад шуд. 

Мумфаршкунӣ ва таъмири қисматҳои алоҳидаи роҳҳоро ҶДММ "Ваҳдат-2018" ба сомон мерасонад. 

Шиносоӣ бо сохтмони иншооти ҷашнӣ дар Исфара

Ба истиқболи 35-солагии Истиқлоли давлатии Ҷумҳурии Тоҷикистон дар шаҳри Исфара бунёду азнавсозии беш аз 500 иншоот ба нақша гирифта шуда, то имрӯз наздик 50 дарсади иншооти ҷашнӣ мавриди истифода қарор гирифтааст. 

Дар иншооти боқимонда корҳои сохтмонӣ идома дошта, сокинон барои таҷлили шоистаи ҷашни миллӣ меҳнат мекунанд. 

Яке аз чунин иншооти ҷашнӣ бинои маъмурӣ, анбор ва нуқтаи шустушӯи нақлиёти ҶДММ «Контанк Интернешнл» аст, ки зимни сафар ба шаҳри Исфара Раиси вилояти Суғд Раҷаббой Аҳмадзода бо сохтмони он шинос гардид. 

Иттилоъ дода шуд, ки аз тарафи ҷамъияти мазкур дар шаҳри Исфара як қатор иншооти ҷашнӣ бунёд карда мешавад. Дар ин раванд дар майдони наздик 2 гектар сохтмони истгоҳи нақлиёти ширкати "Ориён" ҷараён дорад. 

Ифтитоҳи Маркази савдо ва хизматрасонии "Амид" дар Исфара

5 март дар маркази шаҳри Исфара бо иштироки Раиси вилояти Суғд Раҷаббой Аҳмадзода Маркази савдо ва хизматрасонии "Амид" ба истифода дода шуд.

Масоҳати умумии маркази савдо 620 метри мураббаъ буда, он бо тарҳи муосир ва услуби хосаи меъморӣ бо омезиши нақшу нигори миллӣ бунёд ёфта, дар он фурӯши маҳсулоти гуногун, аз қабили лавозимоти рӯзгор, хӯрока, маҳсулоти гӯштиву ширӣ, хуришҳо, хӯрокҳои тезтайёр, нӯшокиву шириниҳо ва ғайра ба роҳ монда шудааст. 

Баробари ба истифода додани иншооти мазкур 70 нафар сокинони маҳаллӣ дар ду баст бо кори доимӣ таъмин гардиданд, ки аксари онҳо бонувон мебошанд. Дар маркази нави савдо тамоми талабот ва меъёрҳо риоя шуда, тамоми маҳсулоти ба фурӯш гузошташуда мустақиман ворид карда мешавад. Ин имкон медиҳад, ки арзиши маҳсулот нисбат ба бозор то 10 дарсад арзон пешкаши мизоҷон гардонида шавад.